1973-ngutillugu, inuKutivut sakKititsilauttut Labrador Inuit katutjiKatigenninganik (LIA) pivalliatitsigiamut Inuit piusituKanganik, piusititsigiamut Kanuittailiutinginnik inositsiagittogusitsanganillu inuKutitta, paitsigiamullu maligatsasuatigut, imminik aulatsiagiamut ammalu inulimângudluta pivitsagijavut ammalu sivumuatitsigiamut Labrador Inuit satusaigutinginnik nunattinut amma namminik kavamaKagiamut. Jâritigut, ikKanallagittunik sivuppiatitsisimalikKugut sakKititsidluta katutjiKatigenninik sollu Labrador Inuit Pivalliatitsinimmut kuaparâsanganik (LIDC), Labrador Inuit Inositsiagittotigasuallugit Aulatsijinik (LIHC) amma Tongâsukkut PiusituKapviligijinginnik.

IkKanannipaujuk Labrador Inuit Satusaigutingani suli pijagettausimangituk. Pigiasittitausimadluni 1977-nimi, 30-ni jârini sukkaitumik pivalliatitausimalittuk. Tainnatolittuk Inuit nunamik satusaigutigisimajanginni Canadami pijagettausimangituk. Taimaigaluattilugu, 2001-nami, LIA amma federallet prâvinsiulu kavamangit atittâgisimalauttut pijagellagingitumik angiKatigegutimmik pijagettaugutitsanganik Labrador Inuit satusaigutigijangita ammalu ilitagijaugutitsanganut Labrador Inuit namminik kavamatsangata. Namminik kavamaKanikkut, sakKititsilâkKugut ilusituKammik namminik aulatsiluta sivunitsatinik.

Auggos 29, 2003-mi, Inuit kavamaillu satusaijingit atittâgisimalauttut pijagellagittumik Labrador Inuit Satusaigutinginnut AngiKatigegutimmik mânnaulittumi Labradorimiut Inunginnut KângittitaugiaKalittumik annigusunnikut. Tainna angiKatigegutik Kângittitaugajappat Labradorimiunut Inunnut, âtaugiaKalâmmijuk Newfoundland, Labradoriullu kavamangita katimatsuavinganut amma federallet katimatsuavinganut annigusotigijaugiaKatillugu.

Akuniungitumi PiusigijauKattasimajuk
Ingigganingit Asianguvalliajut