Âtawâ kajusiutjiKujaulittuk pijagetsiKullugu akilekKujijunut idluatsaivitigut ilinniavinut aullatitauKattadlutik aniguisimajunut

Novembara 25, 2014 – Nunatsiavut kavamanga Kinugiallalimmijuk kavamanganut Canadaup pijagetsiKullugu akilittaugumajunut idluatsaivitigut ilinniavinut aullatitauKattasimallutik aniguisimajunut Newfoundland Labradorimilu.

“Unuttut aniguisimajut Ilaliugutilet Labrador Inuit Nunamik Satusainnimmut AngiKatigegu-tinganut KaKialikviusimagatik aittutausimagatillu Âtawâmi 2008imi Allait Ilinniavimmut AullatitauKattasimajuit Akilittutaudlutik AngiKatigegutausimaninganut,” Kaujititsivuk Nunatsiavut AngajukKânga Sarah Leo. “Canadaup kavamangata uKasimaninga imâk ilinniavinut aullatitauKattasimajuit tâtsumani prâvinsimi ilautitaugunnalungininginnik malittauKujaujut allasimajut malittaugialet Akilittuigiamut AngiKatigegutausimanimmik nalâgottisilungilak.”

1 tausintet aniguisimajut, unuttut Labradorimiut Inuit, tallimatigut immigottukut idluatsaivitigut akilekKujisimalikKut. Idluatsaivitigut kajusinialauttuk nigiugijaulaukKuk wogiulauttuk, tâvatuak ikKatuijet kiggatugialet idluatsataugialinik aulatsisimajunik ilinniavinik (kavamangata Newfoundland amma Labrador, Morâviat Misiuniligijingit ammaluttauk International Grenfell Association Ânniasiukviligijet) atuinnausimalaungilat kajusigiamik. Idluatsaivitsaup ullunga nottausimaligivuk asianut ullumut, ammalu kisiani pigiasittitaungâlâlittuk Septembaraulippat aggâgu.

“KunommititautsiamagikKugut idluatsaivitsaup ullungata asiangutitausimaninganut, tâvatuak KunommiutiKaluakKugut Canadaup kavamanganik taimâk tamatsuminga kamagijaugialimmik pijagettailimmata,” uKavuk AngajukKâk Leo. “Tamanna tuksimanattumagialuk Kaujimadluni unuttut ilinniavinut aullatitauKattasimajuit inogunnaisimalimmata KaKialikviusimagatillonet ammalu akilittausimagatik ânnianattunik siunniunattunillu inogutiKagiaKasimadlutik.”

Allasimajuk ullungani Metsimi 10, 2014ami, AngajukKâk Leo KinukviKavuk AngajukKâsuak Stephen Harper-imik nâmmasingiKudlugu nalâgottumik tamanna kamagijaukKulillugulu, Kinukvigigidlugulu Canadaup kavamanga angikKusiammagilidlugu ilauKataugiamik âkKiKatigegasuagajanninginni idluatsataugialet akilekKulugit ottusiammagigasuallutik nakvâgasuagiamik idluatsaiviup silatâgut pijagetsigajannimik.

“SakKititsigajakKonik sittutitsiutaugajattumik pitsiatumik ilonnainut idluatsataugialinut sivumuattisippâgajakKuk tamaita idluatsataugialet uKâlaliaKigajappata,” AngajukKâk Leo allavuk. “Taimainiangipat, ânniagutaujut avitsimautigijangit Inuit Newfoundlandimi amma Labradorimi âkKiutiKanialungimat Canadamik apomautiKainnaniallutik âkKilautsimagatik.”

AngajukKâsuap suliaKapvinganettut kiusimajogaluat tikitausimanimminik allatausimajunik, tâvatualli suli kiujuKasimangilak Kinugautimmik âkKegunnagajattumik

Unikkausiliuttinut Fonnitausok:
Bert Pomeroy
Aulatsijik Kaujimatitsijiujunik
(709) 896-8582