Ablasângutitsigiamut Pivitsait UKauset
Atuttaugunnatut Pivitsait Atuttaugunnatut
Nunatsiavut Government Logo

Nunatsiavut kavamanga kajusimajuk adjigettisigiamik inuit ammalu kenaujaliugutinut pigumajaujunut inuKutittinut ammalu nunalinni, tigumiallutalu inosittinik, ilikKusinik, sivunganinitanik ammalu uKausittinik.

Unuttuni takKini Kângisimalittuni sakKititsisimalikKugut Kaujimattisigiamut pigumajaujunik utittilugit, piusiumitillugit, paigillugit piulimallugillu ilikKusivut ammalu kinakkoguvit sivuppianikkut sanagiamik Illusuak IlikKusiligivitsamik.  PIjagettautuappat, tânna suliaKapvisak ikajutsiniakKuk pitsatunitsamik inoKatiget ilauKataunitsanginnut ammalu atuKatigellutik ilikKusittini piusituKanik, unikkausinik ammalu atuttausimajunik ilonnâni Nunatsiavummi.  UKausiKalâttuk “unikkausittinik”, takutsauningagut ilutsinga, Kanuilingausinga ammalu takugatsait, ammalu ikajulluni ilauKatauttilugit kinguvâKatiget akungani inutuKait inosuttuilu, kajusimakKulugit piusinginni.

Nigiuvugut ilonnatik kenaujatsait pijagetsigiamut Illusuammik pitâgijaulânningit Kaijuni takKini, ikajuttigenningit tamammik federal ammalu prâvinsimi kavamaujok.  Ammalu, kenaujaliulâkKugut atugatsanik sanajauningata kenaujatsanginnik sakKijânginnaniattilugu Illusuak sivunitsatinnut.  Suli uKumaittunik atugiaKavugut, tâvatuak pivalliavugut, ammalu katsungaivugut pijagelânnitinik tugâgutittinik.

kavamaulluta atuinnauvugut pigunnadluta ikajugiamik nanituinnâjunik ammalu Kangatuinnak ikajugiamut inunnik ammalu asinginnik Kanuttogijaujunik ilonnainut Ikajuttaugutilinnut.  Ilanga Tungavingata Piusigigialingit Maligatsasuattini uKajuk Labradorimi Inuit atuKatigeKattajut kamagigialimminik inotsiagiamut, pilukattailigiamut, paitsigiamut, piujumik aulatsigiamut ammalu pivitsagijanginnik ilonnaita kiggatuttaujut Labradorimi Inuit Inulinginni ammalu atuKatigellutik piluattumik kamagijaugialinnik paigijaugiamut ammalu inotsianitsangit Labradorimi Inuit suguset, Labradorimi Inuit InutuKait ammalu kiggatuttaujut Labradorimi Inuit Inulinginni pigunnasiangitunik ammalu ikajuttaugialinnik.

Ilangattauk tungavingata piusiukKujanga ilauttisimmijuk uppigusunnimik atunit Labradorimiuk Inuk kamagiaKaninga namminik pisongugiamik, namminik sakKijâtilluni, pisongulluni ammalu ikajuKattaluni kiggatuttaujunik Labradorimi Inuit Inulinginni kamagillugu angutik ubvalu annak pigunnaninga, sulijolluni, ikajugunnaluni piujumik aulatsigiamut Labradorimi Inuit InoKatigenninginni.

Tâkkua Tungavingata PiusiukKujangit uKautiKajut ilonnâgut kinaummangâtta Labradorimi Inolluta ammalu Kanuk atâtatsiasuakkuvut uppilaummangâta Kanuk inogasuagunnanittinik, ikKasunnikut, atuinnauluta ikajugiamik ikajuttaugialinnik ammalu ikajugunnaluta ammalu sakKijâtitsiluta namminik piunippaujumik pigunnausittinik.

Uvani jârimi nalunaititsivuk senanganik ullusiuningit Labradorimi Inuit Nunamik Satusaijet AngiKatigegutinganik.  Ullusiunitsait pannaitaulâttut nalunaititsigiamut pimmagiujumik piusittini.  Suli mânnamut pigiasilitainnaKugut pannaigiamik, ammalu KaujimattisiKattaniakKugut ilonnâni jârimi, tikillugunut Nunatsiavut Ullunga, December1.