Ablasângutitsigiamut Pivitsait UKauset
Atuttaugunnatut Pivitsait Atuttaugunnatut
Nunatsiavut Government Logo

AngajukKâp Misitjinga

Pigunnasiguma, namminik âkKisuiKattaniakKunga Kaujigatsanik ilingajunik Nunatsiavut kavamanganut, ilonnâgut angnigusunniusimajuk, asinginnilu pimmagiujunik pivallianiusimajunik, uKâlautausimajut, ubvalu sunait kamagiKattajakka.

Pigiasiligivugut nutâmik kâpitallimik kavamaulluta.  Mai 6-mi, Ikajuttaugutilet Labradorimi Inuit Nunamik Satusaijet AngiKatigegutingani angnigusulauttut kiggatuttisanik kiggatulluta ilonnata Nunatsiavut katimajitsuanginni sitamauniattuni jârini.  Tamaunga ilangit utijut ammalu ilangit nutât – ilonnatik suliatsalet kamagijauKattajunik piusiumititsigiamut inunni ammalu kenaujaliugutiuKattajunik Kanuttogijangit nunalitta ammalu inuKutitta.

Nakummegumavunga ilonnainik atiminik ilisilauttunik, ottugagiamut piujumik ottugadlutik.  Salutitsigumavunga ikajutsilunga ilonnainik kiggatuttinik kamanialimmata suliatsaminik pijaukKujanginnik inuKutitta.

Ilonnatik nutât angnigijaumajut ammalu angnigijaugiallasimajut saimmatitaulâttut Mai 12-mi Hopedalemi.  Nutât katimajitsuat tigusilâttut AngajukKâp Tullisanganik ammalu nutânik AngajukKaunet katimajitsanginnik.  UKâlattisamik tigusilâmmijut.

Pitsatuninga Nunatsiavut katimajitsuangita pigunnatitsijuk ilonnainik kamagiamut Ikajuttaugutilinnik, nâlallugit Kanuttogijangit, ilitagillugit uKumaigijangit ammalu kamagillugit piunippaujumik Kanuttogijangit.

Kiggatuttiulutik katimajitsuani tukisiagiaKavugut, Kinuitsâluta, ikajutsiluta, ammalu, ilonnâgut, atausiuttisilluta sittutigialittinik pigasuagiamut piunippaujumik inuKutittinut ammalu nunalittinut.  Ilonnata ilauKatigevugut suliatsatinni atuKatigellutalu Kanuttogijaujunik sivunitsatinni.

AngiKatigegisimalluta kavamaulluta  aulatsiniuvuk asiujittailillugit uKumaittut kamagigialivut ammalu tugâgutet pitsiagiamut kiggatullugit ilonnatik Ikajuttaugutilet.