Ablasângutitsigiamut Pivitsait UKauset
Atuttaugunnatut Pivitsait Atuttaugunnatut
Nunatsiavut Government Logo

kajusijumik pivallianiujut

Pigunnasiguma, namminik âkKisuiKattaniakKunga Kaujigatsanik ilingajunik Nunatsiavut kavamanganut, ilonnâgut angnigusunniusimajuk, asinginnilu pimmagiujunik pivallianiusimajunik, uKâlautausimajut, ubvalu sunait kamagiKattajakka.

Nutât Nunatsiavut AngajukKaunet katimajingit katimalâlittut sivullipâmik uvani wogimi Nainimi.  Ministeret pivitsaKalâttut ilitatsiutigiamik ammalu piunitsamik tukisimaKatigellutik unuttunik pitjutauKattajunik iluani Nunatsiavut kavamangani.  Nigiuvunga maggoni ulloniattoni katimaKataugiamik pivallianittini uKumaittunik katimautitsanik tugâgutigillugit kajusijumik pivalliagiamik ilingajunik atuttauliaKinitsanga namminik kavamaKagiak piunitsaugasuajumik ilingajuk Nunatsiavummiunut ammalu nunaliKutittinut.

Wogiulauttumi ilaulaukKunga Ungavami Tuktunik katimautiKatillugit Kuujjuaraapik, Nunavimmi ikajutsigiattusimadluta Kanuk kamagigajammangâttigik ullumi uKumailutaujut George River, Leaf ammalu Torngat KakKasuanginni tuktuit.  Ilonnasiatik nunaKakKâsimajut sivukkatattet ilaulaungikaluattilugit, katimanik pitsianiKalauttuk.  Suli Kanuttovugut tamammik Quebec ammalu Newfoundland Labradoriullu kavamâgik ilauKataunitsâginnik UPCART pivalliatauninga akuninut pannaigutimmik paitsigiamut piulimallugillu ikillivallialittut tuktuit.

Asiagugiallak, Nunatsiavut kavamanga kenaujattâsimajuk $7.5 miliun dâlanik illusanut uvani jârimi.  Tâkkunangat, katillugit $2.4 miliun dâlait ilingattitaujut Torngat Avittusimajunik Illuligijinginnut, $1 miliun dâlait ilingatillugit SakKijânginnatunut Nunalinni:  Inositsiagittotitsigasuannimi Nunatsiavut Nunalinginni sakKititaumajut ammalu ilagiadlugit $4.1 miliun dâlanik kajusijumik suliaKagiamut katillugit illusait pannaitauninginnut ammalu asinginnik illusanik.  Tâkkununga ilautillugu, uKausiKalaukKugut mânnaKamik katillugit $700,000.00-tut sanagiagutitsanik ammalu ilâttulugit illuit iluani nunalittini.  Suli manna kamavugut Kanuk tânna kenaujak aittotaulâmmangât.  Nigiuvunga mânnakut tamanna uKautigilâttavut Kaijuni wogini.