Ablasângutitsigiamut Pivitsait UKauset
Atuttaugunnatut Pivitsait Atuttaugunnatut
Nunatsiavut Government Logo

kamagiasinnik suliatsanik

Pigunnasiguma, namminik âkKisuiKattaniakKunga Kaujigatsanik ilingajunik Nunatsiavut kavamanganut, ilonnâgut angnigusunniusimajuk, asinginnilu pimmagiujunik pivallianiusimajunik, uKâlautausimajut, ubvalu sunait kamagiKattajakka.

ItsivaKatigeniammata sivullipâmik pingasuani katimadlutik Hopedalemi Mai 12-14, Nunatsiavut katimajitsuangit taisilauttut nutâmik AngajukKâp Tullisanganik, AngajukKaunet katimajitsanginnik, UKâlattisamik ammalu Tullianik UKâlattiup.

Kuvianattolauttuk katimanik, pivitsaKattisidlutik nutânik angnigijautainnasimajunik ammalu angnigijaugiallasimajunik kiggatuttinik pivitsaKattidlugit sungiutisagiamik ammalu ilitagiutiliaKillutit akunnimini.

Ullusiunniulauttuk, sivullipâmik, Nunatsiavut kavamanga annamik AngajukKâp Tulligilittanganik.  Kate Mitchell, kiggatuttik Makkovimmi, tigujausimalauttuk asiminut kiggatuttiuKatimminut tamatsuminga pimmagiujumik suliatsatâdlugu.  Kate ilitagijautsiajuk Nunatsiavut kavamanganut, sâksini jârini allatiulaugami Nunatsiavut AngajukKaunet katimajinginni ammalu Tulliudluni Minister AngajukKâmut.  Salutigumajaga Kate ammalu ilonnâgut ikajutsilugu.  Ammalu nakummegumagivunga sivullianik AngajukKâp Tulligilauttanganik, Darryl Shiwak, suliaKappâlaummat suliatsamini sitamani jâriulauttuni.  Nigiuvunga suliaKaKatigitsialâttaga Darryl suliatsagilittangani Ministeriulluni Nunaliginimmut Nunamilu Pivianattunik.

Maggonik nutâKagivuk AngajukKaunet katimajinginni:  Greg Flowers Hopedalemiuk ammalu Richard Pamak Nainimiuk.  Greg kigguttiusimajuk sivungagut ammalu ilauKataudluni unuttuni ministeret suliatsanginni, ilautillugit Inositsiagittotitsigasuannimut Pivalliagutinginnulu.  Kiggatugasuajuk tamânegiallaluni.  Richard kiggatuKattasimajuk Labradorimi Inuit katutjiKatigenningita AngajukKauKatigenginni, ammalu taitsumani AngajukKâmut Tulliulauttuk.  kiggatunialittuk Ministeriulluni IlikKusini, Pinguanimmut ammalu Niuggunimmut.

Asingit Nunatsiavut AngajukKaunet katimajingita kiggatuttingit ilauvut Danny Pottle, kiggatuttik Canadami, kajusiniattuk Ministeriulluni kenaujaliginimmut, SuliaKattinik ammalu Kaujimattisigiamut, ammalu Patricia Kemuksigak, kiggatuttik Lake Melvillemi, suliaKanialittuk Ministeriulluni Ilinnianimmut kenaujaliugutinillu Pivallianimmut.  Patricia Ministeriulauttuk Inositsiagittotitsigasuannimi Pivalliataugutinullu.  Saimmatitautillugit Ministeret, katimajitsuat angnigusulauttuk Sean Lyallimik, kiggatuttik Nainimi, nutângulluni UKâlattiunialittuk.  Tullia UKâlattet Patricia Ford, kiggatuttik Canadamiunik, UKâlattiuKattalauttuk.

katsungaigitsiajakka pisonguningit atunit kiggatuttet AngajukKaunet katimajinginni kamaniammata suliagigialimminik kamagigialimminillu ilijausimaningitigut.

Asigiallanga Kaujijaugialik, ilanga akuninit tamânesimalittuk kiggatuttiudluni angnigijaugiallalaungituk Mai 6-mi William Barbour kiggatulauttuk taimanganit Nunatsiavut kavamanga sakKititaulaummanit, ammalu suliaKaKattadluni unuttunik ministered suliatsanginni.  Ammalu akuninut kiggatuKattalauttuk angajukKauKatigenginni Labradorimi Inuit katutjiKatigenningani, ammalu AngajukKângusimadluni.  Ilisimausinga Kaujimausingalu kingummajaummaginiattuk.  PitsiaKujavut sivunitsanginni suliatsamini.

katimajitsuat katilâmmijut wogingani Joni 9 pigiasigiasillutik suliatsaminik itsivaKatigennimini kamagigatsanik ilingajunik sivunitsatinnut.