Ablasângutitsigiamut Pivitsait UKauset
Atuttaugunnatut Pivitsait Atuttaugunnatut
Nunatsiavut Government Logo

Message from the President

Pigunnasiguma, namminik âkKisuiKattaniakKunga Kaujigatsanik ilingajunik Nunatsiavut kavamanganut, ilonnâgut angnigusunniusimajuk, asinginnilu pimmagiujunik pivallianiusimajunik, uKâlautausimajut, ubvalu sunait kamagiKattajakka.

Mai 6-mi, Ikajuttaugutilet Labradorimi Inuit Nunamik Satusaijet AngiKatigegutingani, tigusilâlikKut kiggatuttisattinik kiggatullutik Nunatsiavut katimajitsuanginni sitamauniatuni jârini. Angnigijavut suliatsatâttitaulâttut paitsilutillu Kanuttogijattinik piggagasuajattinik pivallialuta piusiumititsigiamut inunni kenaujaliugutinillu atuKattajangit nunalet ammalu ilonnatik Ikajuttaugutilet. Angijummagik suliatsak, ammalu ilonnatik ottugajut nakugijaugialet ilisimmata atiminik, adjiKangituliugumallutik ammalu takutitsilutik Kanuttonimmiik, sakKititaumajunik sivukkatattiugiamullu. Salutitsivunga ilonnainik ottugajunik ammalu pitsiaKujakka, pikKujidlagaluakKunga ilonnainik Ikajuttaugutilinnik pivitsaKakKulugit angnigusugiattulutik Dienestâgimi ammalu ilautsialutik ikajugiamut ilutsitâllugu sivunitsanga Nunatsiavut. Ilitsi iniKajusi Canadamiuni kiggatuttaujusi, pisimangikutsi, piggagasualaugitsi ilisigiattulusi angnigusotitsinik Nunatsiavut Angnigusujunik SuliaKattinganut Jack Shiwak.

Ammalu, pivitsaKagumavunga nakummelugit ilonnatik kiggatuttet ullumi Nunatsiavut AngajukKaunet katimajingit suliaKappâsimammata Kanuttodlutillu sitamani jâriusimalittuni. Piggagasuannisi pigumanitsilu ikajutsisimavut piunitsamik iniKaKullugu Nunatsiavut kavamanga kamagiamut uKumaittoKattajunik sakKiKattajunik.

PivitsaKagumagivunga nakummelunga pitsialaummata nunalet tamâginni Nain ammalu Hopedalemi tujummitailititsidlutik Clara Hughes-imik Nunatsiavummi Montâg, Âprel 28-mi. Sâksetudluni Canadamiuni Pinguajuni ilitagijaugutittâsimajuk ingiggalauttuk Clara’s Big Ride piusiumititsigasuadluni Kaujimagiamut isumatigut inositsiagittogasuagiamut.

NukKasimaniagami Hopedale-mi, Clara takugiattulauttuk Amos Comenius Ilinniavinganik takujauniadluni ununnisanut 300 nunalinnut. ‘Allavitsak’ Kammamettitaulauttuk nunalet allagunnatillugit sunanik Kuviagisimajaminik ubvalu kitsanattunik. Clara uKâlatsialauttuk piggagasuannigiKattajaminik isumamigut Kanimmasilinnik ammalu mamisagasuadlutik. UKâlautiKalaummijuk pimmagiuninga atugiamik nunanik piusiumitigasuallugit isumakkut inositsiagittogasuagiamut Kanuigatillu, ammalu uKâlautigidlugit kappiasâgijet.

InutuKak Andrea Flowers ammalu Melanie Flowers, sugusillu ilauKattajuk suguset paitsivingani, tunitjilauttut Clara-mut aittotinnik nakutsautinnik, itigainnânik sanajausimajonnik Sarah Jensen-imut, kamennik pegutiKautennik aittotinga Valerie Flowers ammalu adjinganik atuagammik Ordinary Lives Inosituinnait atuagak. Clara aittuilauttuk atigaujamik nunalinni. Nunalik Renatus Onalik (uKattiKadluni Sybella Tuglavina-mik) uKâlalauttuk Kanuk piggagasuasimammangâmmi inosimmini ammalu Kanuk pivalliamangâmmi mamisavalliadluni akKutimini. Moraviamiut katimmavingata Ingitingit tutsialauttut tutsiagusituKammik, Labradorimiut, tutsiagusimmilu, “IlannâKakKa Jesuttut.’ Inuit pinguagusingit pinguataulaummijut, takunnatitaudlutik aulangitunik taggajânik (atuinnaguttitausimajuk Rosie Rosie Hurley-mut) kamagijauluasimaningit inosuttuit.
Kangatattitaugatsait sanajausimalauttut ilinniajunut takutitsigiamik ullusiunnimik, sâlagijanginnik aittuiKattatillugu Clara sâlaKajunik. Kangatattitaujut ammalu “Allavitsak’ allaviusimajut âkKitaulâttuk atuagaliullugu nunalinni.

Clara Kimutsititaulauttuk (Billy Jararuse Kimutsitillugu) aigiasikKâgani Nainimut takugiattutauniadluni 250 nunalinnut, ilautillugit Junior Canadian Rangers, ammalu inosuttuit pisimajut Aullak, Piguvallianik Pitsatusivallianik ikajulauttut tauttutâgigiamik baisikallimik Clara’s Big Ride atugatsanganik Nainimi – baisikallik Kamutennetillugu kalijaudluni Joe Angnatommut pitsialauttuk pisittugani IlauKataujuni 59-naudluni uvani jârimi sukkanikisautiniammata Cain’s Quest.

Nainimi Akilittutaugatik Ikijunniatet sivulilauttut, ammalu 50 sikidot malittilugit. Nunalinni ullusiuniammata unnusami, ilonnata tusalaukKugut namminik unikkausinganik Dorothy Angnatok ammalu aliasuttitaulaugivugut Sundogs, katatjatet Samara Kohlmeister ammalu Emelia Angnatok ammalu April Andersen ammalu Debbie Sue Angnatok. kekkiliuttausimalauttuk takutitsijumik ullusiuningit. Nakulauttuk aulatjaipâdlunilu piusiujunik takugiamik nunalet ilauninginnik.

KuujjuaraapimmelâkKunga, Nunavik Mai 21-24 ilauKataugiattulunga asianik Ungavami Tuktunik NunaKakKâsimajut katimautiKalippata kajusigiamut piggagasuannitinik Kanuk kamagijaugajammangâta ullumi uKumaittuit ilingajut George River, Leaf ammalu Torngat KakKasuanginni tuktuit. Taimanganit katiKatigeniagatta kingullipâmik, ilautillugit nunaKakKâsimajut sivukkatattet pisimajut Quebec ammalu Labradorimit, tikitausimalikKugut ikajuttiget allaganganik kavamanganit Newfoundland Labradoriullu ammalu Quebec ilutsitâvallialinningit ammalu piggagasuaningit UPCART. UKâlautigilâttavut tânna allagak katimaligutta ikajugiamut Kanuk kingullimik pilâlimmangâtta.

NâjikKânanga, nakummegumavunga piggagasuaKattamata suliaKattet SuliaKapvingani Inositsiagittotitsigasuannimut Pivalliataugutinullu Happy Valley-Goose Baymi, ilautillugu Tullia Minister Michelle Kinney, suliaKappâKattamata, pitsianimminik ikKasunimminillu takutitsisimalimmata iniKasimajunik Newman Tujummiuvinginni. Tânna tujummiuvik matuttauniammat pigianningani tagvani takKimi, unuttut inuit initsaKalaugunnaitut. Piggagasuanningit suliaKattivut, suliaKappâdlutik mingutulautsimagatik asingillu ikajuttet suliaKattet kavamanganit Newfoundland Labradoriullu, nunalinni kiggatuttet ammalu asingit nunalinni ikKajusujut katingajet immigojuillu (piluattumik Salvation Army), taikkua initsaKagunnaitut – unuttuit Ikajuttaugutilet – initsatâttausimalittut mânnatuinnamut. Nakummegumagivunga prâvinsimi Minister kamaKattajuk Illusanik, Kevin O’Brien, KanuttotiKalaummat kamaliaKidluni tâtsuminga allaKutiujumik piulimattaujumik, ammalu kamatsiadluni akuninut initsaujunik nottitausimajunut tujummiuvimmit.