Inuit Nunalingita kavamangit sakKititaulâttut Nainimi, Hopedale, Makkovik, KipukKak amma Rigolet. PitsatuniKalâttut aulatsigiamut nunalet pidjutigijaugutinginnik iluanejunik killilipviKapvingita. Tamaita Inuit amma Inongitut tamânimiunguKataujut nunagijaujumi ilauKatausongulâttut Inuit Nunalingita kavamanginnut. Atunit Nunalinni kavamanga pitaKalâttuk AngajukKâmik (AngajukKauluni AngajukKauninni kamajimik) ammalu Katsituinnaugajattunik nunalet katimajinginnik.

Taikkunani nunanni unuttugalannik InuKajuni inilinnik silatânejuni Nunatsiavut, kenaujaliugatik nunalet aulatsivitsangit sakKititaulâttut pivitsaKattisigasuamut ilauKatausongugiamut namminik kavamagijaujumut. Atunit pitaKallutik annigijausimajunik angajukKauninnik kamagiaKatillugit Inunnik tamânimiungujunik nunagijaujumi. Ottotigillugu, Upper Lake Melvillimi Inuit Nunalingita Aulatsivik kiggatulâttuk Inunnik iniKajunik Happy Valley-Goose-Bay-mi, North West Riverimi amma Mud Lake.

AngajukKânga atunit Inuit Nunalingita kavamangata amma itsivautaujuk atunit nunalet aulatsivingata kiggatulâttut annigusuttiminik Nunatsiavut katimatsuatinginni.