AulatsiKatigennik

SuliaKaKatigennik
Unuttutigut angajukKauKatigettigut, ilautillugit adjigengitut kiggatuttet ilonnainit Kanuttojunit katimajiujunit, suliaKapvinga Nunanik Nunamilu Pivianattunik ilauKattavuk aulatsiKataudluni adjigengitunut Nunatsiavummi Kanuttojunut.

Torngat Omajuligijingit Piguttunillu AulatsiKatiget AngajuKauKatiget

Torngat Omajuligijingit Piguttunillu AulatsiKatiget AngajukKauKatiget inunnik kiggatuttiKavuk sepaudlutik kiggatuttet, ilautillugu itsivautanga. kiggatuttet tilijaumavut imailingajut: pingasut kiggatuttet Nunatsiavut kavamanganit; maggok kiggatuttek Prâvinsimi Ministerek; atautsik kiggatuttik Federal Ministeringa. Itsivautanga angnigijaumajuk asiminut kiggatuttiuKatimminut tilijaudlunilu Prâvinsimut Ministerimut.

AngajukKauKatiget pitsatuniKavut sakKititsigiamik, pigiaKaligutik, katillugit pijaugunnatunik niKitsasiullugit ilonnainik omajunik, asinginnilu tingmianik ammalu tuktunik, ammalu piguttunik. Tânna pitsatunik ilingavuk minister pijaukKungitanginnik. AngajukKauKatiget uKautjigiagunnaKutit katillugit pijaugunnatunik niKitsasiullugit tuktunik ammalu tingmianik minister kamagigialingit.

AngajukKauKatiget pigunnaKut uKautjigianikkut asikKitailigiamik aulatsigiamillu maligatsanik ilingajunik omajunut, piguttunut, ammalu nunamiutanut, uKautjigiallutillu federal, prâvinsiullu, ammalu Nunatsiavut kavamanginnik ilonnaini sunani pitjutaujuni ilingajunik aulatsigiamut omajunik piguttunillu Labradorimi Inuit Satusasimajanginni Nunani.
KaujisagiallagunnaKusi Torngat Omajuligijinginnik Piguttunillu AulatsiKatigenik AngajukKauKatigenik, takullutit Torngakuni Tilijaumajut Kagitaujanga.

Torngat Ikajuttigengit Oganniaganut AngajukKauKatiget

Torngat Ikajuttigengit Oganniaganut AngajukKauKatiget inunnik kiggatuttiKavuk sepanik kiggatuttinik ilautillugu Itsivautanga. kiggatuttet tilijaumajut imailingajut: pingasut kiggatuttet Nunatsiavut kavamanganit; maggok Federal Minister; atautsik Prâvinsimi Minister. Itsivautanga angnigijaumajut asinginnut kiggatuttinut tilijaudlunilu Federal Ministeringanut.

Torngat Ikajuttigengit Oganniaganut AngajukKauKatiget uKautjigiajiuvut angajukKauKatiget aulataudlutik Ministerinut. Sivullipauniattuk timiulluni uKautjigiaKattalutik kamagigialinginnik Ministeret asikKitailigiamut oganik ammalu ogait ininginnik ammalu aulallugit oganniagait Labradorimi Inuit Satusasimajanginni Nunani, asingit inuit niKitsasiusongit oganniagait ammalu Inuit niKitsatagunnatangit. UKautjigiajet angajukKauKatigeni ilautitsigunnatut malittaugialinnik ilingajunik silakKijalluni oganniagiamut ammalu piusiugialet aittuigiamut aullaigatsatagiamut oganniagait laisinsinginnik ammalu oganniagait suliagijaugiangit laisinsinginnik.

KaujisagiallagunnaKusi Torngat Ikajuttigengit Oganniaganut AngajukKauKatiget, takulaugit Torngakuni Tilijaumajut Kagitaujangani.

Torngat KakKasuanginni Silatsualimâmi SilakKijapvinik AulatsiKatigejut AngajukKauKatiget

Torngat KakKasuanginni Silatsualimâmi SilakKijapvinik AulatsiKatigejut AngajukKauKatiget âkKitausimajut sepait kiggatuttet, ilautillugu Itsivautanga. kiggatuttet tilijaumajut imailingajut:
maggok kiggatuttek Nunatsiavut kavamangani, maggok kiggatuttek Makivik kuaparesanganit, maggok kiggatuttet Silakijattuligijet Canadamit, ammalu immigojuk Itsivautanga. Mânnaujuk, ilonnatik kiggatuttet AulatsiKatigeKattavut AngajukKauKatiget (CMB) Inovut.

CMB uKautjigiagunnaKuk Torngat Omajuligijinginnik PIguttunillu AulatsiKatigejunik AngajukKauKatigenik, Torngat Ikajuttigejut Oganniatuligijingita AngajukKauKatigenginnik, Nunatsiavut kavamanganik, ammalu asinginnik timiKutiujunik ilonnainik ilingjaunik aulatsigiamut Silatsualimâmi SilakKijapvimik ammalu asinginnik pitjutaujunik ilingajunik Silatsualimâmi SilakKijapvimut uKautjigiakKujaulippata.

CMB uKautjigiagunnaKut Ministerinik ilonnainik ilingjaunik aulatsigiamut Silatsualimâmi SilakKijapvimik, pikKujauligutik.

Tasiujatsoami Avatinik Aulatsijingit AngajukKauKatiget

Tasiujatsoami Avatinik Aulatsijingit AngajukKauKatiget (VBEMB) sakKisimajut atitâgimmata Tasiujatsomik Avatinik Aulatsigiamut AngiKatigegutinga akungani Labradorimi Inuit katutjiKatigenninga, kavamangit Canadami ammalu Newfoundland Labradorimilu; ammalu Innu Allait. VBEMB uKautjigiajiuvut angajukKauKatiget tamânejut atuttausiaKullugit, kamasongullutik, aulatsisongullutik avatet aulatauninginni Tasiujatsoak uganniavingani ammalu siKallevingani.

Tasiujtsoami Attutaunimmut Ikajuttaugutinullu AngiKatigegutik

VBNC (manna Vale Inco-ngulittuk) ammalu Labradorimi Inuit katutjiKatigenga (manna Nunatsiavut kavamangaulittuk) atitâgisimajok Attutaunimmut Ikajuttaugutinullu AngiKatigegutimmik (IBA) Joli 29, 2002-mi. Una IBA pitaKattisijuk unuttunik suliagijaugialinnik ammalu suliaKautiuvuk pivalliagiamut ikajuttigennisangit NunaKakKasimajut nunalet, piusiujuk kampaniujunut pitaKattisigiamik ikajuttaugutinik suliatsamit, timiujjunik NunaKakKasimajut tigulagunnatangit killigiutjinikkut suliatsani, ilitagijauluajuk ikajuttigenningit atunit katimajiuKatiget suliatsanginni.

Nunatsiavut kavamanga IBA-nga AulatsijiKavuk kamaKattajumik atuttauliaKininganut IBA.