SuliaKapvimi Kanuilingausingit

Pigumajatuinnanik
Atullutit unuttunik suliatsaujuni ikajuttaugutinillu, ikajugunnaKugut ammalu uKautjigialluta unuttunik inuKutitta pigumajanginnik ilautillugit inosuttuit ammalu inutuKaujut.

Suliagigumajavut

Paitsigiamut, piusiumititsigiamut, piusiumitillugillu inositsiagittotitsigasuannimut ammalu inosingit Labradorimi Inuit allatausimajutigut nunalinni atuttauKattajut ikajuttaugutellu, ikajutsilugit, ikajuttigennikut.

Suliatsavut

SuliaKapvinga Inositsiagittotitsigasuannimut Pivalliataugutinullu (DHSD) kamagiaKavuk inosinginnik inuillu pivalliataunitsangit pigumajanginni Nunatsiavut Ikajuttaugutilinginni. SuliaKapvik suliaKagiaKavuk malilluni allatausimajunik ilingajunik inosinut Maligatsasuattini.

  • Ânniasiuttaugialet kamagillugit;
  • Atullutik piusiumitigasuallugillu Labradorimi Inuit ilikKusingit uKausingillu;
  • Piusiumitigasuallugit adjigettumik akungani pivitsait kamagijaugialellu;
  • Pitsatunik:  tigulagiamik imminik, imminik pisongugiamik, ammalu imminik sulijutsagiamik;
  • Ikajuttigennik:  suliaKaKatigennik
  • Tatigijaugunnanik ânniasiupviliasimajunut ilauKataujunullu;
  • Kaujimattisinik:  atuKatigennik KaujimajaugusituKanik ammalu tautseKatigellutik Kaujimausinik;
  • Sulijutsaluni imminik asiminillu;
  • Sivukkatannik: takutitsigunnaluni atullunilu sulijumik itjagatsaugiamut;
  • KaujimaKatigennik: angmalutik atuKatigegiamik Kaujimajaugialinnik.

Taimanganit Kaujimattisigiamut, DHSD suliaKasimalittuk sakKititsigiamik piunitsanik atuttaugatsanik ammalu nâmmasiattunik akungani prâvinsiup ammalu federal inositsiagittotitsigasuannimut inunnulu atuttaugatsanik ammalu atuttautiKattajanginnik Nunatsiavut kavamangata.  Kamatsiagiamut tatigijausongulluta ammalu kamasongulluta Labradorimi Inunnik, suliaKapvik nutângutitsigiallaKattavuk suliatsaminik jârimi Kaujimattisidlutik Ikajuttaugutilinnik Avittusimajuttigut Inositsiagittotitsigasuannimut katimanikkut.  DHSD âkKitausimajuk nutâk  Avittusimajuni Inositsiagittotitsigasuannimut Pannaigutinga jâringinnut  2013-2018.

Piusivut

DHSD avittusimajuni suliaKapviKajuk Happy Valley-Goose Baymi ammalu sepait nunalinni suliaKapvet iniKajut North West River, Happy Valley-Goose Bay, Rigolet, KipukKak, Makkovik, Hopedale, ammalu Nainimi.  DHSD ilauttisijuk Annait katimajet SuliaKapviganik Makkovimmi ilauttisijuk Annait Aulatsijinganik ammalu Suliatsanik Aulatsijinga, ammaluttauk SuliaKapvinganik Inosuttuit InutuKaillu, ilauttisijut Inosuttunik Aulatsijinganik ammalu InutuKait Aulatsijinganik.

Avittusimajuttigut DHSD kamagiaKavuk tammasimajuKappat, maligatsait âkKisuttauningit, ammalu suliatsait pivalliatauningit atuttauliaKiningillu.

Nunalitigut, DHSD nunalinni sivukkatattingit suliaKaKatiKaKattavut Labradorimi – Grenfell Ânniasiupvinganik aulatsigiamut inositsiagittotitsigasuannimut ammalu inuit ikajuttaugiaKaningit Nunatsiavummi.  Nunalet Inositsiagittotitsigasuannimut Sivukkatattingit ilonnaini nunalinni ilautitsivuk Paitsijimmik AgvitaKattajumik, Sivukkatattimik, Nunalet Inositsiagittotitsigasuannimut SuliaKattinginnik, ammalu Sugusiligijinik.  Isumaligijinik kamajet sakKititausimammijut, ilangit nunalinni atuKatigeKattajut suliatsaminik amma/ubvalu aittutauKattajut suliatsangita ullusanginnik.

Ikajotivut

Nunatsiavut SuliaKapvinga Inositsiagittotitsigasuannimut Pivallitaugutinullu pitaKattisivuk adjigengitunik ikajuttaugutinik Nunatsiavut Ikajuttaugutilinginnut ukua ilautillugit:

  • Insuarisimagatik Inositsiagittotitsigasuannimut Ikajuttaugutet;
  • Ânnitailigiamut;
  • SungiutilukattauKattajut;
  • Aittunattuit Kanimmaset Aulataunitsangit;
  • InositsiagittoKullugit Suguset;
  • Angiggami Nunalinnilu Paigijaugiak
  • Nuliannikut Inositsiagittotitsigasuannik;
  • Inositsiagittogasuannik Inosikkut;
  • IsumaKatsiagasuannik.

 

Piujotsiangilaten?

ApitsotitsaKaguvit pitjutigillugit ubvalu ânniasiuttaugiaKaguvit; sugusik, inosuttuk ammalu ilaget ikajuttaugiaKappata; ubvalu isumaligijaugiaKaguvit sungiutilukattausonullu ikajuttaugiaKaguvit, apitsulauguk nunalinni inositsiagittotitsigasuannimut suliaKapvik ubvalu takullutit Labrador – Grenfell Ânniasiupvinganik Kagitaujangnai Kaujisagiallagumaguvit.