Niuggunik

KaikKujinik nunatsuamiunik
PisittotiKangilagut angigganganik inuKutitta, tugâgutiKavugut takutitsigiamik ânanâmik nunatsuamiunik unuttutigut sakKititaumajuttigut pivallianiujuni tamâginni kenaujaliugutittini ilikKusittinillu.

Takunnausik

Nunatsiavut sakKilâttut nunatsuami pigumajaunippauluni, piujoninganik, silatsualimâmi ingigganimmut tugâpviujunik.

Suliatsavut

Niuggunet Nunatsiavummi aulatjainiattut piguvallianimmik ammalu avatitigut sakKijânginnanialluni, kamagigialivut, ammalu kenaujaliupvigillugu ingiggatitsinikkut, sulijugillugu ilusituKanga, piusiviningit, ammalu sivunitsatinni Inuit.

Pannaigutik

Niuggunimmut suliaKapvik kamagiaKavuk pivallianiujunik ikajutsilugillu alianattut, inositsiagittotillugit niuggunimmi Nunatsiavummi. Pitâgiamut takunnausinik ammalu akunimut pannaigutimmik piguvalliagiamut sakKititaumajumik, suliaKapvik suliaKaKatiKatsiagiaKavuk niuggunimmut aulatsijinik, ilikKusinut suliaKattinik, allanguattinik, kavamavut itsasuanitaligijinga, asingillu kiggatuKattajut SilakKijattuligijinik Canadami ammalu ACOA/Canadami Siagunitaligijet. Kaujisannikut ammalu nunalinni tungavilet KaujimattisiKattalutik katimanikkut, Niuggutuliginimmut Nunatsiavut Pannaigutinga pijagettaulauttuk 2008-mi.

Pivallianimmut Suliatsait

AtuttauliaKititsinik tâtsuminga pannaigutimmik, Niuggunimmut suliaKapvik kamaluavuk pingasunik pivallianimmut suliatsanik:

  • Aullaigiamut (tautsek, unikkauset, inuillu);
  • Suliatsait pivalliatauningit (pokKainik, niuggujut sungiutisattauningit, Kaujisannet, atuttauliaKititsinellu);
  • SuliaKattuligijet/ilinnianet (inunnik kiggatunnik, immigojut piluattumik).

Suliatsagijavut pivallianingit aulavut tataminattunik Inuit Kaujimajanginnik ilauttitautillugit ukua:

  • Tallimait nunalivut: Rigolet, KipukKak, Makkovik, Hopedale, ammalu Nain;
  • Una Torngat KakKasuanginni Silatsualimâmi SilakKijapvik IniuKattajuk Kaujisapviudlunilu;
  • Iningit siagunitait ubvalu ilikKusitigut Kanuttogijaujut ilautillugit Hebronimi Silatsualimâmi Siagunitait Iniujuit, Ramah, Zoar, Nutak, sivungani inuKasimajut angiggagijaudlutik nunait, nunami iniujuit;
  • Mealy KakKasuanginni Silatsualimâmi SilakKijapvet

kamagigialivut

  • ÂkKitausimajut maligatsait sakKititausimajunut ilingajunik niuggunimmut;
  • Malittilugit sakKijânginnaniattunik niuggunimmut immigojunik pivallianingit aullaiKattagiamullu piusiujunik nittusigiamut sulijutsagiamullu, tamaungautillugit ikajuttaugutingit Inuit ammalu nunalingita;;
  • Atjigettilugit aulatauningit Torngat KakKasuanginni Silatsualimâmi SilakKijapvimi;
  • Aulatjalugu sakKititauningit ilikKusinut avatinullu ilingajut  atuttaugialet ingigganimmut pigumaliaKititsisot nunatsuami ingiggatinut nunatsuami ingiggagiamut Kaujimajaujunik.
  • Aulallugit piunippaugasuajumik atugiamut Kaujimajaujut aulataunitsangit puttunippaugasuajuni;
  • Kiggatullugit atullutik piunippaujunik niuggunimmut ilingajuni kenaujaliugiamut pivalliagutiujuni Canadaup taggâni.

Suliagijaugialet

Pitsiagiamut suliatsanik tagvani, pitaKattisivugut adjigengitunik ikajuttaugutinik suliatsanillu; ilautillugit ukua:

  • SuliaKadlutik ilikKusinut ilingajunik ilauttitautillugu Hebronimi kamajiuKattajut, Sikumi Siaggijautikkadlutik Anugimut IngiggatitauKattajut, namminik kenaujaliuttet sananguatellu allatausimajut, ilikKusinut ulluit, suliaKapvini pannaigianik atuttauliaKinitsangillu suliaKautet;
  • AtuttauliaKininga maligatsait Inongitut atuKattajangit nunalinni/nunami iniujut;
  • Aullaigatsait Nunatsiavummi takujaugumaKattajut inigijaujuni aullaitauluagumaKattajut unikkausittigut, tautsenikkut, inuit, ammalu Kagitaujatigut takugatsait;
  • Ikajutsinik suliagijaujunik pivallianik umiatsuatigut, atjatuttigut, silakkijattigut, nunamiutait takugatsauningit niuggutinut, ilikKusinullu ilingajuit;
  • SakKititsinik Kaujisanninut suliagijausimajunik ammalu suliaKapvini pivitsaujunik atuttaugunnatuni ammalu aullaiKattagiamut pivallianik;
  • Atugunnatitsilutik suliatsani angiutaumajut piluattumik ammalu niuggunimmut ilisattitaullutik/ilinniatitaullutik pivitsaujunik.

 

Aullaigatsaugajattut

Kamatsiagiamut suliatsani Kaujimagiamut aullaigatsaugajattunik pivallianimmilu, takulaugit mânnaKamik âkKigiasimajattinik Niuggunimmut Nunatsiavut Kagitaujangani ammalu Facebook pâginângani.