Nunami anginiKajumi Kagguisimajumik 294 tausind square kilumetanik ammalu 8 tausind maillikasânik (12,874 km) sadjugiaKadluni, Labradori sulijumik kingullipaulittuk pivalliatitaugesimangituni Taggami Amerikami. Inungit 27 tausind 8 hontatuinnautillugit ununnigijangit Labradori unuttunik pivitsaKatitsigunnamijuk. Inuit 20%-titugalak unuttigijut ununnigijanginni inulimât Labradorimi ammalu inuKutivut Kaujimaluattut tukisisimadlutillu pivianattugijanginnik Nunatsiavut kinakkutuinnanit asinginnit. Ammalu mânnaujumi pidjutigijaugunnatut kenaujaliupviKaKatiKagiamut Labradorimiunik Inunnik pitsatulualimmijuk sivunganimit.

Labradorimiut Inuit Nunamik Satusaigutingata AngiKatigegutinga pijagettaulâlittuk mânnakut sivunitsami. Tainna kajusittitauppat nalunaittausimatsialâlittut aulatsiniKagialet nunannik. Tainna nalunaittaugutigilâttanga sakKititsilâttuk songujumik pivalliatitaugutitsanik taggami Labradorimi unutsititauvalliatillugit.

SakKititauninga Inuit namminik kavamaKanninga atâgut Nunamik Satusainnimut AngiKatigegutiup sakKititsilâmmijuk pivitsagijaugiallagajattunik nalunaikkusisimaligatta anginitsamik 2 hontat miliun tâlanit sanautitsamik tamatsumunga atuttaulâttunik ammalu ilagiattaugutitsanik ikajuttaugutet piusitigiattaugutitsanginnut nunaliKutittini, inosinginnilu inuKutitta.

Anattalâmi Suliangujuk sakKititsisimaligettuk nutânik pivitsagijaujunik, amma sakKititauppat Tongait KakKasuanginni SilakKijapvisak nigiunattugiallanik sakKititsilâmmijuk niuggukataKattatunut sakKititauKattatunik. Inuit kenaujaliupviKatigigiangit piujut. PigasuanniKatsiadluta, silatujovugut suliaKalluangudluta. SulijutsaniKavugut imminik pigasuasongujunik, asianguvalliajunik tigumiagunnadluta amma uppiniKadluta pivalliatitsinik sakKiKattaninganik atautsikotillugit pivalliatitsigiamut atuKattatattinik ilusituKattini, atuvallianimmilu nutânik sakKiKattatunik ammalu atuKattadluta unutsivalliajunik pivitsagijauKattatunik.

kenaujaliugutittigut SakKitigumajavut

TugâgutiKavugut atugiamut pitagijanginnik Nunamik Satusainimmut AngiKatigegutittinik sakKititsigiamut pivitsagijaugiallalâttunik ammalu akunikkut ikajuttaugutitsanginnik inuKutitta, pigumausittitut. Piluattumik, tugâgutiKavugut sakKititsigiamut akKutigigajattanginnik inosuttuta suliaKagiutsautitsanginnik, ilinniatitaugutitsangit nottautillugit Inuit nunalinginnut, piguttisivallialuta pigunnausittitut nunaliKutittini, ilautillugit aulatsingânitsavut ammalu suliagijaujunik aulatsigiamut ilinniatitaugutet ammalu atuKatigelluta kenaujanik sakKititauKattatunik pivalliatitaugutinnut. IlitatsiniKagivugut ikajuKatigettivut kajusititsisongugiaKanninginnik sakKititgumajamminik, ilangautillugu tunganatsiatumik pitaKattitaunitsangit kenaujaliuttauKattatunit.