IlusituKammi, Labradorimiut Inuit ilagegiallângudlutik illuKaKatigeKattasimajut, iniKaKatigeKattadlutillu katingaKatigeKattatut upvalu katingadlutik iniKaKattadlutik kangidluni, kangidlininnilu taggami Labradoriup sadjugianginni. Akungani ununnisait Inuit nunaKatigeKattatut, immigolitisimadlutik katingaKatigeKattatuillu atittâtausimaKattalauttut kangidlumut upvalu kangidlinimmut angiggaginigâjanganut. Inuit piusituKangani, ilaget tatiKatigetsainaKattatut ammalu uppiniKatsiadlutik adjigettitauKattagiaKanninginnik angutet annailu, ilusituKammi angutet annailu adjigengitunik kamagiaKattitauKattalaugaluattilugit adjigengitunillu piusiKaKattadlutik.

Inuit piusituKanga akuninit ilusituKausimammijuk tigusigiamut asiangutitâKattatunik, sulijutsasianikkut ammalu katsungaititsinikkut taikkuninga piunitsanik piusitsanik sakKititsiKattatunik.

Pigiannimi Labradorimiut Inuit iniKaluaKattalaugaluattilugit taggami sadjugiannejunik, namutuinnak ingiggakataKattasimajut niKitsasiudlutik pivianattojunik nunami, imappimillu. Europiamiut tamaungaKâtinnagit, ingiggaKattasimajut killinimmit Kikittamut Newfoundlandimut, taikkunani itsasuanitaligijet Kaujisasimajangit takutsautitsijuni iniKaKattasimanninginnik Taggami amma taijaujumi Baie Verte Peninsula. Taitsumaniusimajuk ingigganimmini, taijaujumut Straits of Belle Isle 16 hontait KikKagalangani, takugiusimajuvinet apviniattinik taijaujunik Basque. 2 honatani jârini ununnisani, Labradorimiut Inuit ingiggaKattasimajut siKinimmuadlutik malidlutik omajunik ingiggaKattatunik ammalu aullaigiattudlutik jârik nalliutimmat tamaungaKattasimajunut, unutsivallialilauttunut, Europiamiunut. Taimâk katiKatauKattasimagaluattilugit, Inuit inosinginni piusigisonga Kaujimajautsialaungituk kisiani 1760-ini.

Ingigganingit Asianguvalliajut
Nutâmik Pigiasinnik