|
AngajukKāp Tusagatsanga
Augus 29, 2003
Ullumi, katutjiKatigennivut sakKiviukasālikKut pijagegiamik 30-ni kasāk jārinik nunamut satusajamminik piusigijausimajumik. LIA-kut nigiuvut pigiasigiamik Kāngittitaunitsanganut pijagellagigiamut nunamut satusajamminik wogini Kaijuni. Takunnājavut, Kaujimajanginnut ammalu piggagasuannigijanginnik sakKititsisiasimajunik LIA-kut aulatsijingit ammalu satusaijigijangita tikiutigisimajattigut takunnālittavuttinik, mānnakuluk sivunittini, sakKititausimajuk Labrador Inuit aniggagijanganut Nunatsiavut. Ilonnait tāpsuminga suliaKasimajut Kimaisimavut uvattinut piujualummik adjiKalungitumik. LIA-kut nutāt aulatsijigijangit Kaujimavut piunippaugasuattumik tānna ilitatsigianga adjiKalungituk kajusiutiginginnagianga. TakKini Kaijuni, suliaKagasuatsianiakKugut sivuppiatitsigasuagiamik tugāgutigijattinik tunijausimajunut uvattinut. TikiutikasālikKugut; atuinnauvugut Sivuppiagiallagiamut.
Satusaigegiamut tāpsuminga nunamut satusattaujumut ilonnatinut attuilangavuk. NājiutiKalluni kingullipāmik satusattausimangitumut Inunnut nunamut satusattausimajunut Canadami. Piunitsamik sakKititsilangavuk sivunitsatinnut Labradorimut ammalu inugijanginnut. SakKititsilangavut pivitsagijaujunik. Ammailangavuk nutāmik Tongait KakKasuanginnik SilakKijapvinganik. Labrador Inuit atuinnauvut tāpsuminga sivunitsaKagiamik. KaikKujivugut ilonnainik Labradorimiungujunut, Newfalāndamiunik ammalu Canadamiunik kingullimi suliaginiattavuttinik kingullimillu pinianniginiattatinnik tikiutigillugu.
Labrador Inuit atuinnaulikKut suliaKagiamik. InoKatigijavut takunnāsimalikkut pivalliataujunik Labradorimi, sollu Anattalāmmi suliagijaujumik, ammalu tunitsigiamik sanginigijavuttinik sungujunut suliatsanut pannaigutinnut. kinallonet Kaujimalungitut tāpsuminga nunamik ammalu ajunnanigijanginnik sakKiviujausonik uvattitut. Ammalu kinallonet Kaujimalungitut illinattoninganik ammalu sakKititsigajattanginnik uvattitut. Pijagegianga nunamut satusajangita angiKatigegutinganik sakKititsilangavuk nalunanginitsaugiamut pitjutigillugu aulatauningit nunagijavuttinik ammalu pivianattunginnik. SakKititsigiamut namminik kavamattinik sakKititsilangavuk pivitsagijaujunik, sanatilluta tungavitsanik ammalu pivalliaKullugit kiggatuttauKattatunik. SuliaKagiamik Labradorimi, suliaKaKatigillugit Labradorimiut, tukiKatsiavuk.
Labrador angijualummik silakKijāgiattuKattatunut sakKititsigajattut. Satjugiap taggānga suli angijualummik attutausimangituk nunanga. SilakKijāgiamut Kanuttogutigijaunninga illinanninga angillivallialangavuk sakKititaunninganut Tongait KakKasuangani silakKijapvinganik. SakKititaugajanninga nunamegumatuinnaKattatunut ammalu silamegumatuinnaKattatunut angijualogivuk jāri nāllugu, KanuttogutigiKattagatigu KajagiaKattajut, sikidonguagumaKattatunut ammalu nunammegumatuinnaKattatunut.
Ilautitsisimavunga adjiliugijausimajumik LIA-kut Kaujititsiutinginnik, ammalu kingullimi atuagatsaliuttausimajumik, Nunatsiavut.Kaujititsiutik sakKititsilangavuk piusituKagisimajattinik, nanemmangātta ullumi ammalu pannaigutigijavuttinik sivunitsatinnut. KanuttogutiKavunga pivitsaKagiamut Kimiggugiamut Kaujigatsanik ammalu suliaKaKatigigumavatsi sivunittini.
Ilitagijait,
William Andersen lll
AngajukKāk
Maunga nenillutit AngajukKāp tusagatsanginnik katimatsuanimmi uKausigilauttanginnik (PDF - 0MB)
|
