1973-mi, Labradorimi Inuit katutjiKatigenninga (LIA) sakKititaulaukKut piusiumititsigiamut Inuit ilikKusinginnik; piusiumitillugit inositsiagittotitsigasuannimut ammalu inosingit inuKutitta; paigillugit maligatsasuavut, adjigettisinnik ammalu inuit pivitsangit; ammalu piusiumitillugit Labradorimi Inuit satusajangit Canadami prâvinsimilu nunattini ammalu namminik kavamaKagiamik.  1977-mi, LIA pigiasilauttuk akuninut akKutimmik ilingajumik namminik kavamaKagiamut sakKititsidlutik uKausimmik satusaigiamut kavamangani Canadaup Kinidlutik pivitsaujunik ‘nunami ammalu sikumi Taggâni Labrador’.

Akuninut jârini, satusaijivut piggagasuasimalittut Kanuttogijaminik namminik kavamaKanitsangit Labradorimi Inuit satusainikkut nunanik namminiugiamik.  Tamanna Kanuttogijaujuk sakKititaulauttuk Dec. 1, 2005-mi, Labradorimi Inuit ullusiummata pigianninganik Nunatsiavut kavamanga, avittusimajuk Inuit kavamanga sakKititaudluni allasimajutigut Labradorimi Inuit Nunamik Satusaijet AngiKatigegutingani.

Sivullipauvugut Inuit avittusimajut Canadami pitsiasimanimmik namminik kavamaKagiamik, pisittungitut pitsiasimajaminik ilonnainut Labradorimi Inunnut.

 

Pitsiasimajangit Nunatsiavut

1977: Labradorimi Inuit katutjiKatigenga (LIA) sakKititsivuk namminiugutimmik kavamanganut Canadaup (Canada), taijaujuk “Namminiunnik Satusaigiamut Pivitsaujunik Nunami Sikumilu Taggâni Labrador.”

1978: Canada angiutiKavuk Labradorimi Inuit Nunamik Namminiugiamik satusainnikut.

1980: Kavamanga Newfoundland Labradoriullu (Newfoundland Labradorilu), Kinugausikkut Canadami, angiutiKavuk ilauKataugiamik satusainnimi Labradorimi Inuit nunamik satusaigiamut.

1984: Canada tigusivuk Labradorimi Inuit Nunamik Satusaigiamut pivallianitsanginnik satusaillutik.

1990: Tungavitsak angiKatigennimi uKautiKajuk katimautitsanik, piusiugialinnik, ammalu ullusanginnik nunamik satusaigiamut AngiKatigegutinga (AIP) satusaigiamut atitâttauvuk Novemberami.

1992: SilakKijattuligijet Canadami, LIA, ammalu Newfoundland Labradorilu uKavut ikajuttigellutik Kaujisagiamut atuttauKattaningit Kaujisagiangit sakKititaugasuanninga silatsualimâmi silakKijapvik Torngat KakKasuanginni avittusimajuni taggâni Labrador.

1996: Pijagettaumajuk Kaujisannimut Kaujititsiutik pijagettauvuk silatsualimâmi silakKijapvisanga Torngat KakKasuanginni silakKijapvisaugajattuk. Minister Inuligijikkuni Taggâni Pivallianimmut, AngajukKâsuak Newfoundland Labradorimilu, ammalu AngajukKânga LIA angiKatigevut Jolimi “sukkaligiatsigiamut” nunamik satusainimmut.

1999: AngiKatigegutik AIP atitâttauvuk angajukKânut satusaijinut ammalu uKautjigiagutik ilingajuk katimajinut kajusititsigiamut Maimi. LIA ilaliugutilingit kajusititsivuk AngiKatigegutimmik AIP Jolimi.

2000: Pingasuilingajut katimajet nunalinni nunanik tigulavut satusagatsanik pigiasidlutik Âprelimi. LIA ammalu Newfoundland Labradorilu atitâgivut TukisimautiKatigegutimmik Iluani katimautitsanik Ilingajunik Kinuangujumut Torngat KakKasuanginni SilakKijapvisamut Jonimi.

2001: Nunanik tigulannik satusainikkut pijagevuk Mertzimi. LIA, Newfoundland Labradorilu, amma Canada atitâgivut AngiKatigegutimmik AIP Joni 25-mi. SatusaiKatigennik pigiasivuk akungani SilakKijattuligijet Canadami ammalu LIA, SilakKijattuligijet Canadami ammalu Newfoundland Labradorilu, angiKatigegutimmik sakKititausimajuk Silatsualimâmi SilakKijapvisamik. LIA, Newfoundland Labradorilu, ammalu Canada atitâgivut Iluani kamagigatsanik AngiKatigegutimmi paitsigiamut Inuit pivitsanginni ikajuttaugutinillu satusaiKatigennik AngiKatigegutimmi AIP November 16-mi.

2002: Labradorimi Inuit kajusititsivut Labradorimi Inuit Maligatsasuanganik Âprel 15-mi. LIA, Newfoundland Labradorilu, ammalu Canada atitâgivut Tasiujatsoak Ujaganniavingani kamagijaugatsanik AngiKatigegutimmi, LIA atitâgivuk Inuit Attutaunimmut Ikajuttaugutinullu AngiKatigegutimmi Tasiujatsoak Ujaganniavingalu ammalu Inco Limited; LIA, Newfoundland Labradorilu, Canada, ammalu Labradorimi Innu Allait atitâgivut Tasiujatsoak Ujaganniavingani Avatinik kamagiamut AngiKatigegutimmik Jolimi.

2003: Satusaijingit LIA, Newfoundland Labradorilu, ammalu Canada atitâgivut Labradorimi Inuit Nunamik Satusaijet AngiKatigegutinganik (AngiKatigegutik) Auggos 29-mi. Labradorimi Inuit SilakKijapvingata Attutaunimmut Ikajuttaugutinullu AngiKatigegutik akungani SilakKijattuligijet Canadami ammalu LIA, âkKisuivut ilauKatigenniut ilingajunik Silatsualimâmi SilakKijapvisamut, pijagedlutik November-ami.

2004: Labradorimi Inuit kajusititsivuk AngiKatigegutimmik ikajutsitaudlutik 76.4 per centinut ilaugunnatunut angnigusuttinut 86 per centingit ilauttilugit Mai 26-mi. AtuKatigennimut AngiKatigegutik atitâttauvuk akungani Makivik Nunavimmi October-ami.Labradorimi Inuit Nunamik Satusaijet AngiKatigegutingata PikKujanga, atuliaKititsigunnatuk AngiKatigegutimmik kajusittitaulauttuk ammalu Maligatsaliuttauvuk Newfoundland Labradoriullu Illusuangani katimajitsuanut December 6-mi.

2005: AtuKatigennimut AngiKatigegutik atuttauliaKititsinimmut Labradorimi Inuit Nunamik
Maligatsak C-56, PikKujak atuttauliaKititsinimmut Labradorimi Inuit Nunamik Satusaijet AngiKatigegutingani ammalu Labradorimi Inuit Tâksinut Ilingajunik AngiKatigegutik, kajusittitauvuk Jonmi 15, 2005-mi. Joni 23-mi, Maligatsak C-56 pingajuani atuattauvuk kajusittitaudlunilu kavamami Maligatsaliuttaudlunilu Atanigusimmut Canadami. December 1, 2005-mi, Labradorimi Inuit Nunamik Satusaijet AngiKatigegutinga ammalu Labradorimi Inuit Maligatsasuanga atuttauliaKivuk sivullipâmik katimajitsuangit Nunatsiavut Nottitauvallianingata kavamangani, Nain-imi.