Labradorimi Inuit Nunamik Satusaijet AngiKatigegutinga âkKisisimavuk malittaugialinnik ilauttisilluni namminik kavamaKagiamut ilingajunik iluani nunait satusattaumajut. Nunatsiavut sivullipauvuk Inunni avittusimajuni Canadami pitsiasimalluni namminik kavamaKagiamik.

Nunatsiavut kavamanga Inuit avittusimajuit kavamagivauk. Ilaugaluattilugu Nunatsiavut Newfoundland Labradorimullu, kavama pitsatuniKavuk unuttunik KikKânejunik aulatsigiamut ilauttitautillugit inositsiagittotitsigasuannimut, ilinnianik, ilikKuset uKausellu, maligatsait, ammalu nunalet Kanuttogijangit.

Ilonnâgut aulatsigiamut pitsatuniKavuk maligatsaliugiamik. Nunatsiavummi, Labradorimi Inuit Maligatsasuanga maligatsalagiuvuk Labradorimi Inunni. Ilonnangit asingit maligatsait âkKisimajangit Nunatsiavut kavamangata aulatauniakKut kamagijaugialet malittaugialellu Maligatsasuami.

Nunatsiavut kavamanga aulataujuk âkKitausimajunut piusiugialinni sakKiKattajut Labradorimi Inuit Maligatsasuanganit. Tamakkua malittaugialet uKautiKavut uppigijattinik ukunani:

  • Nâmmagijaujunik adjigettisinimmilu;
  • Piulimatsigiamik ilikKusittinik uKausittinillu;
  • Inositsigittotitsigasuannimut inunnik;
  • SakKijânginnaniattunik kenaujaliugutinik;
  • Piulimajaugasuanningit nunait, imait, omajuit, piguttuilu atuKattasimajangit sivungani inosimajut nunanginni

Nunatsiavut kavamanga aulatsiKattavuk magguilingajonnik, ilauttitautillugit: avittusimajut nunalellu.

Avittusimajuni Nunatsiavut kavamanga âkKisisimajuk sepanik suliaKapvinik:

Nunalinni Nunatsiavut kavamanga kamaKattavuk tallimanik Inuit Nunalingita kavamanginnik kiggatudlugit Inuit nunalet Nainimi, Hopedale, KipukKak, Makkovik ammalu Rigolet.  Inuit Nunalet kavamangit kamagiaKavut kiggatullutik ilonnainik iniKajunik nunanginni.  AngajukKâk atunit Inuit Nunalet kavamanginni kiggatuvuk angutik annaugaluaguni kiggatujaminik Nunatsiavut katimajitsuanginni.

Nunatsiavut angiKatigegutiuvuk âkKitaumajuk kavamani adjigettisigiamik âkKitausimadluni kamatsiagiamik aviukKalugit pitsatuningit akungani kavamait aulatsinellu kavamaujumi.

Kavamani, adjigettisinik angnigijaumajut kiggatuttet Nunatsiavut katimajitsuanginni maligatsaliuKattavut ammalu maligatsaKattisigunnadlutik malittaugialinnik kavamami.  Nunalet Hopedalemi inillagiuvuk Nunatsiavut katimavitsuanganut.  Kaujisagiallagumaguvit, takulaugit Nunatsiavut katimajitsuangita allanginni.

Aulatsigiamut, suliaKapvet Nunatsiavut kavamangani maligatsaliugiaKavut malittaugialinnik Nunatsivummi ammalu maligatsait tilitsigutiutillugit Nunatsiavut katimajitsuanginnut suliatsani kiggatuttaugutini âkKitaumajut kiggatugiamut Labradorimi Inunnik nunalittinillu.  Nunalet Nainimi aulatsivillagiuvuk Nunatsiavummut.