Makkovik iniKajuk taggami sadjugiangani Labradoriup Kaipokok pângani (tukilik "pullakitâjuk imak") kangidlungata. Taggânejuk kitâni KipukKaup amma 2 hontat kilumetagalannik Kaningitigidluni Happy Valley-Goose Bay taggangani.

kenaujaliugutinnut Piniannet, Nigiunattuilu

380-tinik inuKadluni, Makkovik tatiKaluaKattatuk putjotivannianimmik amma Tongait NunakKatigengituni Oganniatuligijingita kuapangani atuttaunippautillugit suliagijauKattatunut. Piujullagimmik aulataummat Kuatsevinga nigiunattojuk atuKattagianganik atuttaungiluaKattatunik ogagalannik atuinnaujunik Kanitanginni. NunakKatigengituni kenaujaliugutinnik pivalliatitaugutinnut katimajet nalunaittautitsisimajut piujullagimmik aulataugusiKanninganik sananguatausimajunik aullaitauvinga Makkovimmi taimaidluni isumagijaulittuk tungavigijaugajanninga pivalliatitsigiamut nunakKatigengituni sananguatauKattatunik aullaivigijauKattagianga. Mânnaujumi sananguagannik aullaivinga piKutiKanippaujuk tamânejuni ammalu aullaiKattadluni sananguatet atugatsanginnik ilonnangani sadjugiammejunut.

Makkovik mânnakut ikKanattulagiujumik itsasuanitamik napvâviusimalauttuk. Amiakkuvininginnik sivullipaudluni misiunet illugisimajangata sakKititausimadluni Morâvianut 1752-mi iniKasimadlutik silatânigalâtuinnak nunaKasimajut taijaujumi Nisbets Harbour KaujimajaugutiKalittuk mânnaulittumi imâk Ford's Bight. Mikijuk nutaungitunik takujapvik unikkausiKajuk piusigijausimajunik Morâviat katimmavinganut tamâni.

Nunaligijet Ikajotingit PiKutigalangillu

Maggonik katimaviKavuk Makkovimmi, Pinticostinik, Morâvianillu. TujummiuviKajut nigipvilimmik, imigapvimilu taijaujumi Adlavik Inn. Maggonik sinipvilimmik ullâsiutittuviusomillu tamânettuKagivuk.

Ilinniavinga taijaujuk J.C. Erhardt Memorial School sanajautainnasimajuk, nutânik ilinniatitaugutinnik piKutiKadluni. Nunalet Makkovimmi aulatauKattatut sepaudlutik annigijausimadlutik kaunsalliujunut.