SakKititausimajuk 1771-nami Morâviat misiuniligijinginnut. Naini uvanejuk 56° 30', taggadlipaunippaujuk nunagijaudluni prâvinsingani Newfoundland, Labradoriullu. Tingijokkut 2 hontat 30 mailigalannik taggânejuk Happy Valley-Goose Bay, anginippaujumi ammalu akKusâpviuKattatumi inunnut ingiggajunut siKinidlianut, kangianut amma tagganganejunut.

Ottotigijausimajut 2003-mi, 2001-nami Kaujisattausimajunit takutsautitsijut Naini 1 tausind 1 hontat 60-nik inuKalinninganik, ununningit Inuit amma Kallunângajuit (Europiamiunik Inunnilu sivullivinilet).

kenaujaliugutinnut Piniannigijaujut Nigiunattuilu

Nunagijaujuk Naini mânnaujumi aulatsiviuKattatuk Inuit katutjiKatigenninginnut amma sadjugianni pinianniuKattatunut. Nalunaittausimalittut tungavigijaunninga pivalliatitaugutinnut ilingajunut Anattalâmejunut amma aulatsiviuKattamidluni kamagijaugialinnik taggami Ð Hebronimi amma Tongait KakKasuanginni. Pimmagiuluattut sivunitsami pivalliatitaugumajut ilautitsijut namminigidlugit kenaujaliugutigijauKattatut sakKititausimajut piKutiKatitsiKattagiamut Anattalâmi ujaganniavet/siKalliviullu ingiggatitaugutinginnik, suliaKapvisaKapvisait, sanaguagalattinut suliaKapvet, niuggukataKattatunik kamagijaupvilet ammalu asiagut oganniaguset sollu unguKattadlugit nuluannut oganniaguset.

Mânnaujumi kenaujaliugutigidlugit oganniagusiuKattatut ingiggaKattatut jârimi Juliminit, Oktoberamut. OganniatauluaKattatut suliagijauKattadlutik Nainiup Kuatsevingani (aulataudlutik Tongait Oganniatuligijingita kuapanganut) taikkua iKaluit, Imappimiutait kavisilet, natânnavait, ijikKutujuit ogatuinnaujâttut taijaujut grenadier amma matsojait. Kuatsevik suliatsaKattisiKattatuk tamânimiunik angutinik, annanillu oganniaKattatunik Kaningitigijumut taggami Hebronimut.

Naini unuttunik adjigengitunik pitaKajuk namminigijaujunik kenaujaliupvigijauKattatunik ilangiutillugit 26-inik illugusilik tujummiuvik nigipviKadluni, imigapviKajuk; niaKojaliupvik; takujagijausonik niuviattalik; akKaumattet kampaninganik; unuttunik utsualuKautialuKapviKadluni; maggonik nigipvilennik niuvipviKadluni; unuttugalannik tujummiuvigijauKattatunik illuKadluni; pingasunik niuvipviKadluni; ammalu unuttunik mikijunik kântrâttitauKattatunik kampaninik pitaKatitsiKattatunik angiggami suliaKapvilinnut ikajuttaugutinnik, illuliuttinik, uKumaittuligiutinnik suliaKautinnik, kiappalotiligijinnik, kopviligijinnik, Kuatsânattukujuligijinnik, motakâlinnik, motavannik attatuttauKattatunik asinginnilu ikajuttaugutigijauKattatunik.

Labrador Inuit Pivalliatitaugutinginnut kuaparâsanga aulatsiKattatuk KilâniKittutalinnik ujaganniatauKattatunik kangidluasutsuami, Kanittumejumi Nainimut.

>b?Nunaligijet Ikajotingit, PiKutigalangillu

AulatauKattatut nunaligijinnut kamagijauKattatut sepaujunut annigijausimadlutik Nunalet kaunsallinginnut. Adjigengitut federallet, prâvinsiulu kavamangita suliaKapvinginnik kiggatuttiKagivuk tamâni.

NâlautiKapvik taijaujuk Canadian Broadcasting Corporation (CBC) pitaKatitsiKattatuk nunalinnik ullâkut (AM) nâlautikkogutimmik amma nunalet nâlautikkogutiKammijut taijaujumik FM tusâttausonguKattatumik 36-ini sitontini atunit wogimi Kallunâtut, Inuttulu. kenaujanik katitsuivik taijaujuk Bank of Montreal aulatsiviKammijuk Nainimi angiKatigegutiKasimadlutik allalidjusialigijinnik aulataujumik taijaujumut Canada Post.

PitaKagivuk atautsimi illugusimmejumik siagunitaKapvimik, ilinniagiutsatitaupvimik/ullukut paigijaupvimik amma pigiasitainnatunit grade 12-imunut ilinniavigijauKattatumik atuttauKattatumik 4 hontagalannut ilinniatunut aulataudlutik Labradorimi Ilinniavet AngajukKauKatigenginnut.

Kanuittailigiamut ikajuttaugutet aulatauKattatut sepanut ânniasiupvimi paitsijinnut, tallimautillugit ikajuttingit amma atautsik ânniasiutik iniKadlutik ânniasiupvimi taijaujumi Health Labrador Corporation Clinic. Labradorimiut Inuit Inositsiagittogutitsanginnut kamajet pitaKatitsiKattamijut adjigengitunik Kanuittailigiamut ikajuttaugutinnik.

Unuttut ikajuttiudlutik katingaKattatut amma nunalet katutjiKatigenningit aulatauKattatut Nainimi.