Nunatsiavut tukiKajuk "our beautiful land." Ilautitsijuk ilonnainik nunannik iluanejunik Labrador Inuit Nunamik Satusaipvigijangita. Takunnalugu tatiKallaginnivut nunattinik, Nunatsiavut nâmmasiattuk atigijaugianga nunagijattinut nutâmullu namminik kavamagijattinut.

SakKititaulâttuk Nunatsiavut malittautillugu Labradorimiut Inuit Maligatsasuanga. Kângittitausimatillugu ilaliugutilittinut 2002-mi, takutsautitsijuk piusigijaukKujanginnik inuKutitta ammalu pitaKadluni tungavitsamik sakKititaugutigilâttanganik Nunatsiavut kavamangata. Tainna Maligatsasuak uKautiKajuk adjiungitonningajanginnik Labradorimiut Inuit ammalu paigijaugiaKanninginnik, piulimajaullutillu nunavut, piusituKavut amma uKausituKavut. KamagijaugutittaKajuk kamagigialinginnik atunit Inuk ilauKataunnigigiaKajanganik piujumik kavamaKanimmut, piulimatsiagiamut ammalu songujotitsigiamut ilageKutittinik, ammalu piulimatsigiamut sivullita nunanginnik aulatsisianikkut avatittinik.

Maligatsasuavut tatituaKajuk namminik aulatsiluta sivulliutigialittinik. IlitatsiniKajuk kinakkutuinnait asigijangit Inuit iniKaKataunningit Nunatsiavuttimi ammalu Nunatsiavut ilangauninninga Canadaup. KamagijaugutittaKajuk adjigengitojunik ammalu atugiaKannitinik kavamaligiutittitini, inoKatigegusittini ammalu piusituKattini iluingaigiaKanittinik. IlitatsiniKajuk ilauKatigeKattanimmik amma angiKatigegutiKattanimmik piguvalliatitsinik tungavigijaugunnaninginnik aulatsisiasongugiamut. KilligiudjiniKajuk pivitsagijanginnik Inuit ilauKatauKattagiamut kavamaminut, ammalu kavamamik kamaKataugiaKatitsidluni. IlitatsiniKajuk adjigettitaugiaKanninginnik angutet annailu ammalu songusigiattisidluni killigiudjisimanittinik Canadami PikKujatsasuamik Pivitsagijattinut ammalu Ulapitaugata PisongugiaKanittinut.