Labrador Inuit Pivalliatitaugutinginnut kuaparâsak (LIDC) - LIA kenaujaliugutinnik pivalliatitsigiamut kiggatuttigijanga pigasuagutiKajuk piusititsivalliagiamut inogusinginnik Labradorimiut Inuit sakKititsiKattalutik pitaKatitsilutillu suliatsanut kenaujaliugutinnulu pivitsagijaugunnatunik. KamaluaKattatut ilusituKaujumi ilisimajaugiaKaKattatunik amma ilinniatitsiKattadlutik nutânik ilisimajaugiaKaKattalittunik pivitsaKattitaugutinnik. LIDC kajusititsiKattasimalittut sakKititsidlutik unuttugalannik ikajuttigennikut kenaujaliugutigijauKattatunik, ammalu pitaKatitsiKattatut uKaudjigiagutinnik ikajutsiutinnilu 30-nut unulualittunut Inuit kenaujaliupvinginnut Labradorimi. LIDC namminiKajuk aulatsidlunilu maggonik KillâniKittutalinnik ujaganniavennik Nainiup Kanitangani ammalu namminiKadlutik ujaganik suliagijaupvimik Hopedalimi. Kinitsainatut kenaujaliupvigijaullutik pivitsagijausonguKattatunik.

Anattalâmi Inuit SukkutauniKagajappata Ikajuttaugutinnulu AngiKatigegutik (IBA) - AngiKatigegutigisimajavut Anattalâmi Ujaganniatet kampaninganut takutsautitsijuk Kanuk LIA tugâgutiKammangât kajusititsigiamut sakKitigumajattinik. LIA amma Ujaganniatet kampaninga ikajuttigennikut kamagiaKajok sakKititaugutitsanginnik IBA-kut tugâgutigijaujunik Labradorimiut Inuit ilauttitaunitsanginnut tamainnut suliatsatâgijauKattatunut amma kenaujaliupviKagiamut pivitsatâgijauKattatunut. Taimaimmat, Inuit tigujauKattaniattut ilinniatitauKattalutillu suliaKasongugiamut suliagijaujumi, amma kenaujaliupvet Inunnut atuttauluaKattatut isumatsasiugutigijauKattalâttut pitaKattisijiugiamut. Tamaita LIA amma kampanik kamaKattalâttut avatet sukkutauniKammangâta suliangujumut ammalu ikajuttigellutik ikullaumingattitaugutitsasiuKattalutik. Labradorimiut Inuit kenaujatigut ikajuttaugutiKalâmmijut tunganattojumik sanasonguttitautillugu kampanik.

Federallet Ilinniatitsiutingit amma kenaujaliugutinnut Ikajotingit - NunaKakKâsimajonniminut atâgut federallet aulatsiutingita, Labradorimiut Inuit pivitsaKattitaujut unuttunik ilinniatitaugutiKagiamut, kenajaliugutiKagiamut ammalu pisiniagutinnik ikajuttaugutiKagiamut sakKititausimajunik unutsititsigiagutitsautillugit nunaKakKâsimajut ilaugutitsanginnut Canadami kenaujaliugutigijauKattatunut. LIA aulatsigunnatuk atuttaugusitsanginnik tamakkununga ikajotigijauKattatunut.