Nunatsiavut unikkausinga uKautiKajuk siagunittanik sikunillu. 8 hontat miliunini jâriusimajuni, angijualuk 4 biliuninik jârinik nutaungitigijuk ujagâluk ammuasimajuk nunamik Kummuatitsidluni mânna taijaulittumik Labradorimik, Canadaup killinganejuk kitâni. Sikugiallâsimajut, ilanga idjutigitillugu 2 kilometatut mânnakonippaujumi sikuinnausimajuk, ilutsitâgisimajuvinik nunanganik. Ukumainningit pitsatunigisimajangillu ingigganingita sanasimatillugit kangidlunik, tasinnik amma natsâlunnik takutsaulittunik 2 hontat 94 tausind square kilometani nunagilittangani ullumi Labradorimi.

Angininga nunaummat, Labradori pitaKajuk ilanganik kingullipaulittuni upattaulautsimangitunik nunannik tamâni silatsuami. Taggami Labradori pingasunik immigolingajunik KakKasuaKajuk. killapait pitaKajut KilâniKittunik illigijaullagittunik sananguatinnut silatsuami ilonnâni. Kaumajet pitaKajut aumaudlutik puilasonik ujagaKajut amma sitijutsajanik ujagaKadluni. Taggadlipaujut KakKasuat taijaujut Tongait, angakkuit angigganga. PuttuniKajut 2 tausind metasitut, taikkua KakKasuat puttunippaujut kitânejuni KakKasuat taijaujut Rockies.

KakKasuannit, napattuluvinilittigut amma nunatsuakut, imait koKattatut imappimut KikittaluviniKajumut piKalujalunnilu. Imappimi avatinga atuttaulagiKattamat piusituKammilu tatigijaullagidluni taggami Labradorimi taijautuinnaKattatuk ilangani "Sadjugiat." Anginitsaujuk 7 tausind 8 hontat kilometanit sadjugianga unuttunik ogagalaKajuk, angijunik imammiutannik, timmianillu ikajuttaugutigisimalittanginnik Labradorimiut Inuit tausindigiallâni jârini. Taggami Labradorimi, imappik akKutitsuagijauKattamijuk; ammajumejut imait ingiggaviuKattatut unuttunut imammi ingiggautinnut, amma ukiumi sadjugianni sikunga ingiggajunut atuttaunginnamijuk.

Nunalluasianga pitaKajuk pingasunik adjigengitunik aujuittosonik. SiKingani, napâttuluvinilet adjigengitunik sollu napâttutuinnanik, pinginnik amma taijaugusiKatigengitunik napâttunik sollu Killagittut. Taggânigiak, napâttuluvinet tikiKattatut puttunitsanut, asiangudluni nunanga napâttutuinnanik napâttuluvinilimmut ilanga ujagatuinnautillugu amma nunatsuami avâlaKiat amma pigugunnatut shrubs. Taggânigiallak nunatsuangutillugu napâttuit nâjipvinga, ikittunik paungalinnik napâttulinni nunami sunaKatsiangitumi avâlaKialet, uppigait uKaujaKasot, amma adjigengitunik pigupviusoni pigugunnatunik..

Nunanga unuttunik inuKatsialautsimangimat, omajuluviniKajuk. Angiggagijanga ununnipaujut tuttuit silatsuami. Asinginnilu angijunik omajunik sollu adlait amma nanuit, nunanga pitaKammijuk amagunik, tigigannianik, kigiannik, sitsinik, pamiuttonik, kiggavinnik, illâgusinnik, avinganik amma nunivakkagalannik. Sadjugianginnejut angigagijaujut puijinut amma whales. Timmiat ilangiutillugit nattugalet, Kinnuajot, ikketujot, mitet, nillet, imatsumesot amma sidjagiat. Ilonnatik ilautillugit pitaKadlatumut tatiKatigedlutik omautiKattatunut.

5 tausindini jârini iniKadlutik Nunatsiavuttimi, Labradorimiut Inuit tatiKallagiliaKisimalittut tâtsuminga nunamik omajugalanginnilu. Omajunniadlutik, oganniadlutik, mikigianniadlutik, nunamillu atuKattadlutik ilusituKammini tigumiasimalittut avatinginnejunik kamatsianimmik mânnamunut nutânut kenaujaliuguset pivalliatitaugutinginni. Nunanga pivianattuKutingillu pitaKatitsiKattamijut uvattinik atugatsatinik sananguagusittinut, iliuttâgusittinut, unikkâgusittinullu. Nunak, inungit, piusituKangalu: iluingagamik ilusigijangit nalunaittaugutigivauk Nunatsiavut.