Piusigisimajangit

Labrador Inuit Nunamut Satusajangita akunialuk tikiutigasualittuk. kamagijaugiasijautluni 1977-imi, satusaigiasilauttut satusaigegiamut pigiasitluni 1988-imi. Juni-, 2001-nami, Labrador Inuit ammalu Federallet ammalu Prāvinsikkulu kavamangit atittāviKalauttut Pijagellagingitumik AngiKatigegutimmik. Kāngittisigianganut AngiKatigegutillagimmik pigiasijaudluni 2003-imi. AngiKatigegutik paigijaulangavuk atāgut angiKatigenniujunut atāgut Canadaup Maligatsasuanganut. Tukisititsigiatsilangavuk ilagengunnigijavuttinik akungani Labrador Inunginnut ammalu kinguvagijavuttinut nunanginnut ammalu akKutigijaullunillu Labrador Inunginnut namminik kavamaKagiamut, taijaulāttumut Nunatsiavut kavamanga. AdjiKalungituk nājiutigijaulāttuk akuni nalunagijausimanninginnut pitjutigillugit nunait, pivianattuit, imait pivitsagijaunninginit ammalu atuttauKattaninginnut, pivalliatauningit, avataliginimmut ammalu sivunitsagijanganut Nunatsiavut ammalu inoKatigijanginnut.

Nunak Satusattaujuk Iluanettut

Labrador Inuit namminiKajut nunaKakKāsimajiullutik pivitsagijanginnik ammalu namminiKallutillu Labradorip taggāni ammalu Quebec-iup kitāni takKāni. Labradorimi, ilonnanga katillugu 55,000 square miles (142,450 km2) ilautitautillugu 17,000 square miles (44,030 km2 ) atajumut imappimik. Inigilluasianga ilautitaujuk Labrador Inuit Nunamut Satusajangita AngiKatigegutinganik, taijaujuk Labrador Inuit Satusajangita Iluani, mikinitsauvuk. Ilautitsivuk 28,000 square miles-imik (72,520 km2) nunanik Labradorimi ammalu 17,000 square miles (44,030 km2) imappimik. Labrador Inuit namminiKanialungitut tāpsuminga nunamik, tāvatuak ikKanattunik pivitsaKalangavut ilinganiKajunut iluggusitut nunanik atugiamut. Iluani Satusattaujop iluani, Labrador Inuit namminiKalangavut 6,100 square miles (15,800 km2) annigijausimajiullutik Labrador Inuit Nunanginnik. Tākkua nunait aulataulangavut Nunatsiavut kavamanginnut. Ilagiallugullu, 3,900 square miles (10,101 km2) sapvataulangavuk Tongait KakKasuanginni SilakKijapvisanganut. Labrador Inuit Nunanik Satusajanga Quebec-iup kitāni takKāni suli kamagijaugialik.