Labrador Inuit katutjiKatigenninga kenaujaliugutiugani kuaparâsaujuk kiggatudluni 5 tausind 3 hontagalannik Inunnik, Kallunângajunnilu Labradorimi. Kallunângajunik Inuit taigusigijanga akulligenik aulinnit Labradorimiut Inuit amma Europiamiunik sivulliKasimajut. LIA ilaliugutilingit ununningit iniKaluattut Labrador Inuit nunalinginni ukunani Nain, Hopedale, Makkovik, KipukKak amma Rigolet, amma Upper Lake Melvilliup Kanitanganejuni, ilautillugit Happy Valley-Goose Bay-miut, North West Riverimiullu. LIA sakKititausimajuk 1973-mi ilitagijaugutittâtausimadluni 1975-imi. SakKititsiKâgatik katutjiKatigennimik, Labradorimiut Inuit KaujisapviKaKattasimajut Inunnik sivukkatattiujunik Canadaup ilonnâni.

LIA kamagiaKajuk sivumuattitaugutinginnik nunaKakKâsimajut, maligatsasuanganik, imminik aulatsinigigialinginnik, inoKatiget ammalu inulimât pivitsagijanginnik Labradorimiut Inuit. PivalliatitsiKattajuk Labradorimiut Inuit uKausituKanganik piusituKanganillu. SuliaKaKattatuk piusititsivalliagasuadluni Kanuittailiutitsanginnik InoKatigetsiagusitsanginnilu inuKutitta. PinianniKaKataudluni aulatsiKatauKattatuk piulimatsiKataudlunilu oganniagusittinik, omajuttinik amma nunami pivianattuKutittinik. LIA kamagiaKajuk satusaigiamut Labradorimiut Inuit Nunamik Satusaigutinganik ammalu sivumuattisigiaKadluni Inuit namminik-kavamaKanitsanginnik. LIA kajusiniKatsialaummijuk piulimatsigiamut ammalu kiggatunniKagiamut Inuit Kanuttogutigijanginnik Anattalâmi ujaganniaviujuk pivalliatitaugiasimmat, sakKititsiKattadlutik angiKatigegutigijausimajunik akunga kavamait, Innu Nation amma pivalliatitsijop.