Tusagatsait AngajukKāmit

InoKatiget LIA-kut IlaliugutiKajunut,

Labrador Inuit Nunamut Satusajangita AngiKatigegutinga atittātausimalittuk LIA-kut satusaijinginnut ammalu kiggatuttiujunut Prāvinsiup Newfalāmi Labradorimillu ammalu kavamakkut Canadami. Atāgut Labrador Inuit Maligatsasuangani, kingullimi piniannigijauniattuk sakKititauninga allaKutiujuk ilaliutiKajunut Kāngittitaunitsanganut annigusunnikut.

UppiniKavunga tānna angiKatigegutik piujualuk. Suliaginialittaga mānna nalunalunnanga ilonnait Inuit pivitsaKagianginnut Kimiggugiamik ammalu uKālautigigiangallu AngiKatigegutik. 30-nik jārinik tamaunga tikiutisimalikkugut, ammalu uvattinut kisiani, sugusittinut ammalu ingutagijavuttinut pivitsaKattisiKagiamik ammalu piggagasualluta kajusiutiKagiamik Kaujimatsialuta.

Tamāni Kagitaujatigut sakKititsisimavugut ilonnanganik Labrador Inuit Nunamut Satusajangita AngiKatigegutinganik ilonnainut takujausonguniammat. Ammalu sakKititsisimavugut allatausimajunik naittotitausimajunik ajunnanginitsanik uKausinnik allatausimajunik ammalu tukisiagutinginnik maligatsatigut allatausimajunit. ammalu sakKititsisimavugut nunanguanik ammalu asinginnik adjinguanik takutsiasonguKattaniagatsi uKausinik iluani nunanejunik. Tākkua ikajuniammata tukisigiamik AngiKatigegutimmik, imāk suli pikkujigajakkunga Kimiggugullusi ammalu nāmmasikkulusi imminik ilonnanganik allaKutiujumik.

Wogini Kaijuni, LIA-kut suliaKattingit ammalu ākKisuilākKunga katimautitsanut ilonnait Inuit nunaliujunut tuniukKatausonik atuattausonik, tukisititsigiagiamut angiKatigegutimmik, kiuKattaluta apitsutaujunik ammalu tusallutalu isumagijatsinik. IlauKataukKujivatsi tāpsuminga nalliuvigijaulāttumik piusitsagijaugasuajumut.

William Andersen III