Maligatsaliginimmut ilingajunik Nunatsiavut kamapvigiKattalâttanga Hopedali; aulatsiutingit kamagijautillugit Nainimi.

Nunatsiavut kavamanga pitaKalâttuk AngajukKâmik, AngajukKauniujunik katimajinik, katimatsuatinnik ammalu kavamaligijinnik, inoKatigegusinnik, piusituKannik ammalu kenaujaligiutinni suliaKapvinik sakKititausimajunik katimajitsuanut.

AngajukKâk amma Nunatsiavut katimajitsuangit annigijaullutik ilijaulâttut tapvanegiaKatillugit sitamani jârini. AngajukKâk itsivautagijaulâttuk Nunatsiavut AngajukKauniudlutik katimajinginnut amma Nunatsiavut katimajitsuanginnut. Katimajitsuat ikinnisaugiaKatinnagit 16-nanit.

KatimajitsuanguKataujut annigijaulâttut kiggatuttiKatillugit sepani Inuit annigusuttinginnut ukunani: Nain, Hopedale, Makkovik, Rigolet, Upper Lake Melvilliup Kanitanganejunik asinginnilu Canadami. katimatsuatiuKataujunit, AngajukKâk tilitsiluni ilijautitsilâttuk katimatsuatet Aulatsijitsanganik ikajutsitautillugu katimatsuatiujunut. Tainna katimatsuatet Aulatsijinga tilitsiluni ilijautitsiniammitillugu katimatsuatiujunit AngajukKauniudlutik katimajinginnut.

Nunatsiavut katimatsuatingit ingiggalâttut Inunnut kavamaligijiullutik. kamagiaKallutik akigattotillugik katimajitsanik ammalu maligatsaliujutsanik amma kamaKattalutik piniannigiKattatanginnik AngajukKauniudlutik katimajet. AngajukKauniudlutik katimajet atuliaKittisiKattalâttut Inuit maligatsanginnik, pivalliatitsiKattalutik amma atuliaKititsiKattalutik piusigijaugialinnik, pigiasititsiKattalutik amma atuinnaguttigiKattalutik maligatsaliuginnimik, kamaKattalutik aulataugutinginnik kavamaup, ammalu kamagijauKattalutik katimatsuatinnut.