Tongait KakKasuanginni SilakKijapvik
Aittosiangusimajuk Ilonnatinut

Tongait KakKasuangit nunami inigijauKattatut taikkunani ajunnanippaujuni KakKasuanni kitânejuni Taggami Americami takutsautitsijuni silatsuami iniKunannipauKataujunik ajunnatunejunik sadjugiannik. Nunami ilusigijangit tamâni puttujumedlutik iniKunadlatut taikkua tamânettunik takusimajuk uKausitsamik napvâgunnaKattangitut ippigisimajamminik tannimini. Taikani nunait tataminnatunik kangidlunik takiniKajunik 80 kilumetatut; taikkunani innait puttujumeKattatuni imappimit 9 hontat metanut; ammalu Kilatsuangani Labradoriup angiggagijaujumi puttujumejunut 2 tausind metatut imappimit. Tapvani nunanni angijualuit nanuit mikijojâttitausongujut piKalujatsuanut atuKattataminut ingiggautigidlugit sadjugiatigut.

Tongait KakKasuangit pitaKajut piujodlatunik natsâlunnik ilutsiKajuni U-tut, aumaluangajunik tasiKadlutik, KullutuKadlutillu ammalu unuttugiallanik unikkautitsanik nillatâttuni sakKijâsonik. AdjiKatsiangitut pukkinitsni angiggaKaKattatut napâttutuinnait ununnisaungâKattagaluatillugit piguKattatut aujuittumesot avâlaKiagalait, kauttungajait, niKât, ivitsukait amma aujuittumesot piguttugalait. Nunanguani, ilangait tamânejut ujagagalangit nutaunginippauKataujut silatsuami.

Omajuit tamâneKattatut sollu adlait, kajuit amma KaKuttâsuit tigiganniat, ukalet, amaguit amma kiggaluit. Taikkua 7 hontat tausindinit unuttugijut kangidlualudjuap Tuttungit iniKaKattatut ilonnagalanginnik tamâni. Nanuit takujauKattatut tamânejuni ajunnatuni sadjugianni, killigiudjivut inigisomminik/tâtsumani nunaKutiujumi. Imappimiutait timmiagalait sollu siggulutuit, appait, amma saviatsojait iniKaKattatut sadjugianni atuKaKatiKadlutik pivianattutanginnik imappiup âllunik, pamiuligannik amma apvinik ammalu unuttunik adjigengitunik puijinik Kangaulimmalu aivinik. Ikaluit amma Imappimiutait kavisilet ingiggavingit tamâni silatsuami pitaKannipaujut.

SilakKijapvimut Piusigijausimalittut Ilusigilittangalu

Isumagijaugiasisimalauttuk SilakKijapvitâgiamut Tongait KakKasuanginni suli 1970-ni Kaujimajaulimmat nunait taimailingajut paigijaugutiKangininginnik Canadami. 1992-mi kavamâgik Canadaup amma Newfoundland Labradoriullu amma Labradorimiut Inuit KaujisaliaKilauttut Kanuk atuvalliniKagajammangât SilakKijapvik paitsiutigillugu nunannik ilingatillugit ilonnainut Canadamiunut.

Pititsitillugit Kaujisanniusimajuk amma Labradorimiut Inuit nunamik satusaigutingit, angiKatigegutik sakKititausimalauttuk nalunaittautitsitillugu silakKijapvisaKapvisamik anginiKatillugu 3 tausind 1 hontat square kilumetatugalak. Tamakkua Inuit ilusituKagijammini nunagimmait, inuKutivut nipiKattitautsainagialet Kanuk silakKijapvisak sakKititaugiaKammangât Kanullu aulataugiaKammangât. kamatsianiKagasuamut Inuit aulatsiKataunningit anginitsautijangit atuttautillugit, ammalu ilusigijanga nunaup asiangutitaugunnangininga Inuit angisimatinnagit, tainna nunak nalunaittitausimajuk ilangautillugu Labradorimiut Inuit Satusaipvingata Iluanejut ammalu piKutitsangit allatausimadlutik sakKititausimajut Labradorimiut Inuit Nunamik Satusainnimut AngiKatigegutingani.

SakKititauguni, Tongait KakKasuanginni SilakKijapvik kenaujaliugutigijausongulâttuk Labradorimiunut Inunnut, Prâvinsinganut Newfoundland, Labradoriullu amma Canadaup kavamanganut. kenaujaliugutigijaugutingit sakKititausimatillugit tukisiKatigetsiasimanikkut, uppiutiKatigenikkut, angiKatigegutitsiuKattanikkut ammalu atunit sulijutsaKatigennikut. Ammalu ilitatsisimanikkut tainna Tongait KakKasuanginni SilakKijapvik nalunaikkutagijausongunninga atuKatigedluta illigijattinut ilonnata atausiulingattitausongunittinut Canadamiungulluta. Sulijuk aittosiangusimajuk ilonnatinut.