Anattalâmi SuliangujukTasiujatsuami Ujaganniaviujuk

Ilangaujuk pitaKanippaujuni kenaujatsajanik taijanik nickel-kâpak-cobalt napvâtausimajuni silatsuami, Tasiujatsuami ujaganniaviujuk iniKajuk 35-ini kilumetani siKiningani kangianejumi Nainimit taggami Labradorimi. PitaKajuk immigolittitausimajunik pitaKajunik kenaujatsajanik KaujimajaugutiKajuni imâk Reid Brook, Discovery Hill, Ovoid amma Eastern Deeps. Tainna taijaujuk Ovoid Kanittomat nunaup Kânganut ammajumi ujaganniaviugunnagajattuk. Asingit itinitsamemmata nunaup iluani ujaganniataugiaKagajattilugit.

Tainna Ovoid Kaujimajaulittuk pitaKanninga 32 miliun tansigalannik kenaujatsajannik imailingatillugit 2.83 persintet nickel, 1.68 persintet kâpak amma 0.12 persintet cobalt. Asingit ujaganniaviulâttut isumagijaujut pitaKanningit 118 miliun tansitugalak ottugattausimadlutik nalautsâgutigijausimajut Kanuk angitigijumik pitaKammangât. KaujisattuKagiallagiaKalâkKuk, nunaup iluanilu KaujisattuKalluni, Kaujigiamut ilonnanginnik pitagijanginnik kenaujaliugutigijaugajattunillu pivianattutanginnik.

Anattalâmi Suliangujuk

Ujaganniavik/SiKallevillu/Ujaganniataujunik pejaigutik atapvigijanginnit

Ujaganniavik amma siKallevik/ ujaganniataujunik pejaigutik atapvigijanginnit sanajaulâttuk ujaganniaviujumi ammalu pijagettaulutik magguilingajumi suliagijaugutiKatillugit. Suliagijaugutinga 1 pigiasittitausimalauttuk 2002-mi atuttaugialet pivalliatitautillugit, ilautillugit sanajaunningit akKutitsait amma itsavitsak, amma siKalleviup initsanga âkKisuttaudluni. Sanajaunningilâttanga ammatillugu ujaganniaviulâttuk 6 tausind tanset tigujauKattatillugit atunit ullumi siKallitaullutik immigolittitauKattatillugit Anattalâmi pigiasittaulâttuk 2004-rami ammalu pingasuni jârini pijagettauluni, akitutigitillugu 7 hontat 10 miliun tâlatugalak. Sanajauningit tamakkua atuttaugialet nigiugijaujut sakKititsigiangit 17 hontanik inop jâringinni suliatsaugajattunik (5 hontat 50-tillugit ununnipauligutik) Jârimi suliatsaKattitaulâttut ingiggatitauningani 4 hontagalaulâttut.

Tainna siKallegutik/pejaigutillu sakKititsilâttuk maggonik adjigengitonnik: kâpammik amma kenaujatsatalimmik pitalimmik nickel-kâpak-cobaltimillu. Tainna kâpak aullaitaulâttuk akitunippâmik akilegajattunut, taikkua kenaujatsajait nickel-kâpak-cobaltimillu pitalet pigiannimi suliagijaugiattulâttut Inco aulatsivinginnut Ontario amma Manitobami, kingungani aititauniammilutik kenaujaliugutigijaudluni autseviKapvimut sanajaulâttumut Argentiami Kikittami Newfoundlandimi.

Nunaup Iluanejut Kanuilingalâmmangâta Pivalliatitaugusigilâttangillu

Suliagijautigilâttanga ll Anattalâmi Ujaganniavik pivalliatitaugutinga pigiasittitaulâttuk nunaup iluanejut Kaujisattautillugit ammalu ujaganniavik pivalliatitaunninga suliagijaulluni Kaujitsiagasuamut Kanuk angitigijumik pitaKammangâta ammalu sakKititsilutik ujaganniatuKatillugu piusigijaugialinnut pannaigutimmik. Pigiasittausimalauttut 2002-mi nunaup Kânganejut kamagijautillugit pijagettaugiaKatillugit 2006-imi. Nunaup Kânganejut suliagijaunningit akitutigilâttut 20 miliun tâlatut suliaKattiKallutik 85-inik. Nunaup iluanejunik Kaujisannik suliagijaunninga akiKalâttuk 75 miliun tâlatut ilautillugit akKatitaugutingit Kaujisattaugutet amma anittigipvisait, ammalu pivalliatitaullutik akKutitsait ujaganniaviujumut. Tamanna isumagijaujuk pigiasilânninga 2014-nami ammalu taitsumani KaujimajaugiaKalâttuk nâmmatumik ujaganniatausonik atuinnaKalâmmangât nâmmagajattunik ingiggautitsagigiangit siKallegutiup/pejaigutiullu atuttauninginni nottaulittilugit ammajumi ujaganniaviusimajumit.

Nunaup iluani ujaganniatuKatillugu, jârimi suliaKattigijaujut unutsigiallalâttut 8 hontagalannik. kenaujait atuttaugiaKalâttut nunaup iluani pivalliatitsinimmut ammalu atuttauningit siKallevet/pejaigutellu ilagiattaugutingit isumagijaujut 7 hontat 50 tâlatogiangit.

Atugatsait

Atugatsait ikajutsiutigijaullutik ujaganniavimmik amma siKallevimmik/pejaigutimmilu suliaKautinnut atuttaulâttut Anattalâmi ilangiulâttut ukua:

• Usingijapvisak Anattalâp kangidlungani - inigijausonguKattaluni sâksinut piKutitsanik usiKattatunut pujulinnut ammalu ujaganniatausimajunik usiKattalâttunut atunit takKimi.
• Tingijop mipvinga ujaganniaviujumi - pitaKatillugu ullugianattuKagani tikikatapviusomik sitamanit sâksinut tingijonnut ujaganniavimmut atunit wogimi.
• Tujummiuvet - tujummiuvitsangit nigipvisangalu nâmmatillugit 350-nut suliaKattinut. Ammalu, 44 kilumetanik atugatsanik akKutiliujuKalluni aulautigijaugialinnut ujaganniavimmi.

Labradorimiut Inuit IlauKataugusingit

Anattalâmi napvâtausimajut suKusititsimangât ilusituKamini nunanik atuKattasimajanginnik, LIA amma Ujaganniatet kampaninga satusaigutiKasimalittut SukkutaujuKagajappat Ikajuttaugutitsanullu AngiKatigegutimmik (IBA) takutsautitsijumik atunit kamagigiaKajattinik kamatsianiKagasuamut Labradorimiut Inuit anginippaujumik atusongugiaKanninginnik nigiunattunik suliatsanik ammalu kenaujaliugutiKagiamut ikajuttaugutitsanik ingiggatitaunningani ujaganniavik. Kampaniup kingulliani suliaKapvingata jârimi nalliutipvingani Anattalâp kangidlungata Kanitangani suliaKannipauttuKatillugu Septembera 2003-mi, 25 persintinit ununnisaulilauttut kampaniup suliaKattingit LIA-mut ilaliugutiKajut. LIA ilaliugutingit idjagatsaugumadlutik suliaKattisiangugasuaKattalittut, ammalu pannaigutiKadlutik akunik suliatsaKattitaugiamut atuluattunik suliaKagiutsaKattadlutik ammalu ilinniagiallaKatauKattadlutik suliamini atugialimminut ilingajunik. SanajuKatillugu suliagijaunningani kampaniup suliagijangani, sanajiugiamut kântrâttitauKattatut tigusiluaKattatut suliaKajunik ujaganniavimmi. Theresa Hollett, LIA IBA-ngagut Ilinniatitaugutinnik SuliaKattitaugutinnilu Aulatsijinga, suliaKaKatiKaKattasimalittuk kântrâttisiKattatunik kamatsianiKagasuamut pisongunnilet LIA ilaliugutilingit pitâKattamangâta tigumiaKattamangâtalu Anattalâp kangidlunganejuni. Theresa itsivaKatauKattatuk suliaKattisiuttinut maggonut ununnipaujunik suliatsaKattisijennik. Tongait Ikajotinginnik Aulatsijet (TSI) amma IKC Borealis, ammalu ilauKataunninga tainna annak suliaKattinik tigulaKatauKattatunik katimajinut sakKititsisimalittut unuttugiallanik suliagilittanginnik LIA ilaliugutilingita. Auggose 23, 2003-mi wogi nâningani, TSI Kaujijautitsilauttuk 49-persintinik LIA ilaliugutilinginnik suliaKattiKanimminik amma IKC Borealis Kaujititsisimatillugu 25 persintet suliaKattingit ilaliugutiliunninginnik LIA-mut.