1760-ni, Morâviat misiuniligijingit sivullipausimalauttut Europiamiunit inuttâgigiamut taggangani taijaujop Hamilton Inlet. Tunitsiviusimadlutik angijunik nunannik Britishinit, iniKaliaKisimalauttut Nainimi, UkKami, Hopedalimi amma Hebronimi, niuvipvitâdlutik Inunnilu sangutitsidlutik uppitogiamut.

Tamanna pigiannigisimalauttanga angijumik asiangutitsisimajut Inuit inoKatigegusinganik. Morâviat nukKatitsisimalauttut Inunnik iniKaKattatunik siKinidlingani Labradoriup. NukKatitsisimalaummijut Inunnik aullâsimaKattaninginnik jâri nalliutimmat, iniKakKulidlugit misiunet aulajanginni. 18 hontait nânigalanginni, ukiumi angiggagiKattalilauttangit ununningita Labradorimiut Inuit Morâviat MisiuniKapvingit. Taimâk piKatiKaKattaningit Europiamiunik sakKititsilauttuk uKumaittualummik. Unuttut Inuit tuKuKattasimajut Europiamiut Kanimmasinginnut timingit sungiutisimalaungimata pitaKalaungitut aittutaugekkutinnik. Ukumainnipausimatillugu, Kanimmasialosimajuk siammasimalauttuk 1918-nani taijaulauttuk Spanish Flu, tikiutijausimalauttuk pujulikkut, unuttunik nungugaisimalauttuk Labradorimiunik Inunnik.

Aulataudlutik atusongunningit Europiamiut niuvianginnik asinginnik sakKititsilauttut. Siagolittilugu, Inuit atuliaKilauttut nutånik piusinnik ammalu unutsivallialidlutik ilauKattatut kenaujaliugutinnut Newfoundlandimi, Labradorimillu. Mikigiannianet, puijinnik nuluannianet, ogannianet amma kavisilinnianet atuttauliaKillagidlutik, aullaitauKattadlutik tautsegutigijaudlutik Morâviat amma immigolingajut niuvittigalait niuviatsanginnut. Akuniugialimmet, Inuit inosinga tatiKavallianialidluni niuvipvinik. Pigiannimi, niuvipvet ingiggasiasimalauttut, tâvatuak 1920-ni Morâviat sanatsiagunnaigamik asiujiKattaligamik aullaisimalauttut niuvipviminik taggami nunalinni killinimmit, Makkovimmunut Hudson's Bay kampaninganut (HBC). Tâvatuak mikiluadlatumik sanaKattalauttut taimaimmat 1940 kavamait aulatsiliaKiniadlutik Hudson's Bay niuvipvinginnik.

Newfoundlandi ilijauKataukKâtillugu Canadamut, Morâviat katimmavinga, Grenfelliup ånniasiutiligijingit amma prâvinsiup kavamanga kajusititsisimalauttut nukKatitsigiamut ikajuttaugutinnik taggami nunalinnut Hebronimi, Nutâmilu. Taikanimiut nottitaugiaKalidlutik Nainimut, Hopedalimut, Makkovimmut amma North West Riverimut. kavamak uKaudjisimalauttuk Inunnik inogusivut, kenaujaliugutivullu piunitsaulâlinninganik. Sunaupvali, inogusivut, piusituKavut kenaujaliugusivullu sukkutitaungâniadlutik, suli ullumimut ânniatitsijuk tamanna.

Asiangutitausimanningit inosingit Kikittami Newfoundlandimi pititsitillugu nottitausimannik Kaujimajautsiagaluattilugu, sukkuisimannigijanga Labradorimiut nottitausimanninginnut suli uKautigijautsiasimangituk. Kimaittitaudlutik ilusituKammini nunagijamminik amma nunami pivianattuKutigijanginnik ânnianadlalauttuk inunnut piusituKanginnut ammalu kinaunningit ilingallagittilugit tatiKanimminut nunaminik. Inuit nottitausimalauttut nunalinnut taikanimiut tigumialigettilugit oganniavimminik, omajunniavimminillu pivitsagijamminik tigumialigettunut; tikitainnasimajut aigiaKaKattatillugit Kaninginitsanejunut pivianattuKanginitsaujunut. Unuttut sunaKutigijauKattalaungitut nopvigisimajammini nunagijaujumi. Unuttunut, killigiudjiviugutigisimajanga piunitsamik inosiKalânningit sulisimangininganut ammalu pigumangikaluattilugit tatiKagiaKasimanningit niKitâtitsijinnit ikajuttaugiaKalidlutik asiujititaudlutik imminik sulijuginimminik, ippigittitaulidlutik naggugijaunimminik, adjigettitaunginimmilu. 1970-ni, siagutsuanit piusituKagijausimajuk imminik pigasuaKattanikkut unuttunik asiujititausimalilauttuk. AsiangutitaujuKagiaKalilaukKuk, aulataullutik tamatumani Inunnut ammalu tugâgutigijautillugit Inuit kingomagijangit, sivulliutitaugutigigiaKajangillu.

Akuniungitumi PiusigijauKattasimajuk
Nutâmik PigiasiutiKannik