Sivunitsavut pitsiatunejuk! 40 per sintet Labradorimiut Inuit inosuttojut 25-init jârikinnisaujut. katsungainniKatsiadlutik pigasuagutiKagumadlatut isumatsasiusongudlutillu. IkKasunniKadlutik sivunitsanganik Nunatsiavut amma ikKasunniKadlutik piulimatsigiamut Inuit piusituKanganik.

Ammalu adjigengitut ilinniatitsigiamut ikajutsitaugutet sakKititausimajut ikajotitsautillugit inosuttunik annigusugiamut ilinniagutigigumajamminik ilinniagiallagiattuviuKattatuni ilinniatitaugutinni, LIA, akKutiKadlutik Tongâsukkut PiusituKapviligijinginnik, sakKititsisimalittut pitsatuniKatitsidlutik Labrador Inuit Inosuttungita Aulataugutinginnik kamajitsanik. kamagiaKatillugit piusituKagijavut ilusituKagijavullu Kaujimajautsiamangâta inosuttutinut ammalu takunnausingit inosuttuta atuttauKataugiaKanninginnik ilusigilâttanganut Nunatsiavut. Atâni allatausimajut ikKanammagittut pigasuaguset aulatauluattut Inuit inosuttunginnut.

Songusititsigiannik Imminik Aulatsiutittinik

Inosuttut katimajingit taijaujut Rising Youth Council (RYC) nunakKatigengituni inosuttuit katimajingit 13-nanik kiggatuttiKajut Inuit nunalinginnit amma Upper Lake Melvilliup Kanitanganejunik. AngajukKâsanga annigijauKattatillugu atunit maggoni jârenni inosuttunut ilauKattatunut Jâri Tamât Inosuttuit katimatsuanigiKattatanganut amma AngajukKângata Tullianejutsak annigijauKattatillugu Inosuttut katimajet akunganit. Taikkua katimajet Kittaingatsiadlutik katimaKattatut takKi tamât fonnitigut ammalu katingadlutik katimaKattamidlutik magguitudlutik atunit jârimi. LIA inosuttunik kamajingit KiniKattatut nunalet kaunsallinginnit suliagijaugajattunik isumatsasiugutigijaugajattunillu ammalu kamatsianiKagasuamut Kaujimattitautsiamangâta inosuttuit nunagijanginni.

Labrador Inuit inosuttungit ikajuKattamijut imminik aulatsinigijattinik akKutiKadlutik Jâri Tamât Inosuttuit katimatsuanigiKattatanganik. katimatsualimmata tamât suliatsatâgutinnik ilijautitsigasuaKattatut. LIA suliaKapvingit kiggatuttingillu sakKititsiKattatut Kaujititsiutinnik piniannigiKattatanginnut. Kaujititsiutet katimautigijauKattatullu ilingaluaKattatut pidjutigijauKattatunut ikKanaluattunut inosuttunut. Kângisimalittuni pidjutigijauKattasimalittut sunagalatuinnait ilangiutillugit atunik tupâkunik amma aittunattunik sukkutitsinattunik (HIV/AIDS) Kaujimattitaugutinnik.

Kângisimalittuni katimatsuaniuKattasimajuni ilautitsiKattasimammijut namminik kavamaKagiamut ottunguagutinnik pinguatitsidlutik/inosuttuilu kavamaligijiudlutik katimatsuatiunguajunik. katimatsuaninga pijagemmat, katimaKatausimajut pikKujaliuKattatut aitiKattadlugit LIA-mut amma inosuttut aulatsitinginnut, taikkua pikKujaliuttausimajut aititauniammitillugit LIA jâri tamât katimatsuanigiKattatanganut isumatsasiugutigijaugiaKatillugit kajusittitaullutillu.

Piulimatsinik UKausituKattinik PiusituKattinillu

Upingâmi aujamilu UKausituKammut PiusituKammulu ilingajunut AullâsimanniuKattatut ilautitsiKattatut 14-nanik Inunnik inosuttunik annigijausiimajunik ilonnainit nunaliujunit aullâsimagiamut ilusituKagijangatut Inuit piusiKadlutik suliaKattiKadlutik uKagiutsatitsijinik, inutuKannik, aulatsijinnik pailatigijauKattatunillu. Aullâsimanimmini, inosuttuit piKatigeKattatut inutut uKagiutsatitaudlutik, Inuit pinguagusituKanginnik, katatjasongugiamik, mitsugiutsagiamut, ilusituKammi igausinnik omajutsiugusinnilu. Atuligamik namminik inosigijaujumik ilinniadlutillu Inuit ilusituKanginnik, inosuttuit tukisiliaKiKattatut Inuit illigiluattanginnik ilusituKagijanganillu.

InutuKait inosuttuilu katingaKatigennigiKattasimajangit piujullagimmik piKattatut, ippigiummititsigiaKattadlutik maggonik ikKanannipaujonnik kingulligenik katingatitsiKattanikkut. Ullumi ikKanalualimmijuk kamatsianigigiaKajavut initsaKattitautsiamangâta taikkua uvattinik atattisiKattatut ammalu taikkua pitsianiKattisilâttut Nunatsiavuttimik. Taikkunani katingaKatigennigiKattatanginni, inutuKait inosuttuilu uKâlautiKaKattatut adjigengitunik pidjutigijauKattatunik, ilautillugit imminik inuagumaKattatunik nukKangattisigasuagutet, nottitausimanimmut ilingajunik, silak asianguvallianinganut, uKausituKammik piusituKammik amma Kitungiunimmik.

Inosuttuit aulatsiKatausimammijut sakKititsidlutik Nunatsiavut Kilaudjatinik, kamatsianiKadlutik taimaittunik ilinniagutet sakKititaugiallanitsanginnut atuttauKattatillugit ilusituKaujumi Inuit katingaKatigegusinginni piusigiKattatanginnilu.

Inosuttuit kamanningit Inosuttuit PidjutigiKattatanginnik

Uppivugut pitsatuniKatitsinittigut inosuttunik kamagiamut inosuttut pidjutigiKattatanginnik sakKititsivallianiannitinik aulatsijiugiamut ilisimajaugiaKajunik kamatsianiKagasuamut ilonnata piujumik sivunitsaKagiattinut. Tongâsukkut Inosuttunik Aulatsijingit sakKititsiKattatut JâriKatiget AjuKittutaugutinginnut katimausitsanik nukadlet puttunitsani ilinniajunut ammalu puttunitsani ilinniatitaujunut tallimani ilinniavinni. JâriKatigennik ajuKittutaugutik aulatauKattatuk ikajuttaugutitsautillugu ilinniatunut sittutitsisonguKattagiamut nâmmasingiutigijauKattatunik aulataungâtinnagit inummaginnut upvalu inittitaugutinnut pijauKattagasuangimut.

Inosuttut suliaKattitaunningit ikKanattulagiujuk pidjutigijauKattatuni ammalu sakKititsivalliasongudluni aulatsijiugiamik ilisimajaugiaKajunik. Inosuttut SuliatsaKattisigiamut PiusigijauKattatuk, kenaujaKattitauKattatuk Inulijigillaginnut Canadami, atuttisiKattatuk Inunnik inosuttunik suliaKausinnik ammalu suliagigumajanginnik KaujijautitsiKattad